Հունիսի 30-ին Եվրոպայի լիգայի նախընտրական փուլի շրջանակներում Գորիում տեղի է ունեցել «Շիրակ» (Հայաստան) եւ «Դիլա» (Վրաստան) ֆուտբոլային խաղը, որն ավարտվել է միջադեպով:
Վրաստանի հայ համայնքից հաղորդում են, որ խաղն ավարտվել է 1:0 հաշվով «Դիլայի» հաղթանակով, որից հետո մի քանի տասնյակ վրացի երկրպագու, հիմնականում դպրոցահասակ, հարձակում են գործել Գորի ժամանած, հայ երկրպագուներին տեղափոխող միկրոավտոբուսների վրա:
«Լարվածությունը սկսվել էր դեռեւս մարզադաշտից ոչ հեռու գտնվող սրճարանում: Հայ երկրպագուները պատրաստվում էին մեկնելուն, երբ նրանց են մոտեցել մի խումբ երիտասարդներ եւ փորձեցել են կոնֆլիկտային իրավիճակ ստեղծել: Վիճաբանություն է ծագել, բայց ամեն ինչ արագ ավարտվել է: Դրանից հետո վրացի երկրպագուները, հիմնականում դպրոցահասակ, քարեր շպրտեցին մեր ավտոբուսի վրա, երբ այն դուրս էր գալիս Գորիից: Մենք դուրս եկանք ավտոբուսից, սկսվեց կռիվը, բայց շուտով եկավ ոստիկանությունը, եւ հարձակվողները այս ու այն կողմ փախան: Մի քանի հայ երկրպագուների տարան ոստիկանական բաժանմունք ցուցմունքներ տալու համար…
Ինչպես մեզ հայտնի է, ձերբակալված է հարձակվողներից մեկը: Մինչդեռ, նորից ոչ պաշտոնապես, մեզ ասացին, որ չեն կարողացել գտնել այն անձանց, ովքեր քարեր էին նետել միկրոավտոբուսի վրա եւ կոտրել ապակիները…», -ասել է իրադարձության ականատեսներից մեկը:
Վրաստանի Ներքին Գործերի նախարարությունը դեռեւս պաշտոնապես որեւէ կերպ չի մեկնաբանել տվյալ իրավիճակը:
Դեպքի արդյունքում տուժածներ չկան ո´չ վրացական կողմից, ո´չ հայկական:
