«Կազանի փաստաթուղթ» անունով համաձայնագիրը վտանգավոր է Հայաստանի ու Արցախի համար։ Այս մասին, այսօր՝ հուլիսի 1-ին, լրագրողների հետ հանդիպման ժամանակ նշել է ազգագրագետ Հրանուշ Խառատյանը՝ նշելով, որ ըստ բանակցվող պլանի Արցախին հարակից՝ ազատագրված 7 շրջանները վերադարձվելու են Ադրբեջանին, Արցախն ստանալու է անհասկանալի մի կարգավիճակ, ադրբեջանցի փախստականները վերադառնալու են Բաքվին վերադարձված տարածքներ, որից հետո պետք է քննարկվի ԼՂ կարգավիճակը. Ընդ որում, Ղարաբաղն իրավունք չի ունենալու սեփական զինված ուժեր պահել:
«Վտանգավոր փաստաթուղթ է, որն իր մեջ պարունակում է պատերազմ սկսելու հնարավորություններ, առիթներ է ստեղծում դրա համար: Այս փաստաթղթի շուրջ համաձայնության գալուց հետո կարելի է ընդմիշտ ձեռք քաշել Լեռանային Ղարաբաղի որևէ կարգավիճակի և բնակչության ազատ կեցության որևէ հնարավորությունից»,-նշել է ազգագրագետը:
«Ընդդեմ իրավական կամայականությունների» ՀԿ նախագահ Լարիսա Ալավերդյանն իր հերթին նշեց. «Դա հատուկ ձևով շրջանառության մեջ է դրվել ժողովրդին համաձայնեցնելու այդ մտքին և համոզելու, որ սա է ճանապարհը: Պատահական չէ Գերմանիայի արտգործնախարար, ԵԱՀԿ գործող նախագահ Ֆրանկ-Վալտեր Շտայնմայերի հայտարարությունը, որ ստատուս քվոն չի կարող այսպես շարունակել, քանի որ այն պարունակում է էսկալացիայի նոր հնարավորություն: Սա ոչ այլ ինչ է, քան կոչ, որ նա կարող է սկսել էսկալացիան, և դա արվում է թե՛ ՀՀ իշխանությունների, թե՛ միջազգային ընդգրկված հանրության կողմից հանցակից լինելով»:
Ալավերդյանը կարծիք հայտնեց, որ Հայաստանը չպետք է թույլ տար, որ Արցախը դուրս մղվեր բանակցություններից. «բանակցություններից Արցախի դուրս մղման հենց առաջին օրը պետք է Հայաստանն Ադրբեջանի հետ որեւէ սեղանի շուրջ չնստեր»:
Անդրադառնալով այդ պլանի այդ կետին, ըստ որի առաջարկվում է միջանկյալ ժամանակահատվածում խրախուսել Քելբաջարի եւ ոչ թե Լաչինի շրջանի հայ համայնքի հեռանալը եւ հանձնումն ադրբեջանական վերահսկողության, Լարիսա Ալավերդյանն ասաց. «Այսինքն՝ կլինի բաց դուռ՝ ԼՂՀ-ն ու Հայաստանն ուղղակիորեն վտանգի տակ դնելով: Հասկանալի է, որ հինգ շրջաններում Ադրբեջանի տնօրինության դեպքում որեւէ ձեւով պատերազմական գործողություները չեն սահմանափակվի՝ անհնար կլինի Ադրբեջանին հետ պահել նոր ոտնձգություններից, ինչպես հիմա է»:
