Ռուսաստանը եւ Թուրքիան «խոշոր հաշվով» տարաձայնություններ չունեն այն մասին, թե ում ահաբեկչական խմբավորում համարեն Սիրիայում, բոլոր խմբավորումները, որոնք իրենց «հայրենասիրական ընդդիմություն» են համարում եւ պատրաստ են հաշտության, պետք է լքեն «Ջաբհաթ ան-Նուսրայի» եւ «Իսլամական պետության» դիրքերը, հայտնել է Ռուսաստանի արտգործնախարար Սերգեյ Լավրովը, հայտնում է «ՌԻԱ Նովոստին»:
«Խոշոր հաշվով մենք տարաձայնություններ չունենք (Թուրքիայի հետ) այն մասին, թե ում համարենք ահաբեկչական խմբավորում, ում համարենք ոչ ահաբեկչական», — հայտնել է Սերգեյ Լավրովը: «ՄԱԿ-ի Անվտանգության Խորհրդի բանաձեւերի համաձայն, ահաբեկչական խմբավորումներ են համարվում ԻԼԻՊ-ը եւ «Ջաբհաթ ան-Նուսրան» եւ դրանց կից տարբեր մանր կազմակերպությունները», — հիշեցրել է նա:
«Երբ այդ որոշումը քննարկվում էր, Ռուսաստանն առաջարկում էր դրանում առնվազն եւս երկու կառույց ներառել` «Ահրար աշ-Շամ» եւ «Ջեյշ ալ-Իսլամ», որովհետեւ վկայություններ կան, որ այս կազմակերպությունները խախտում են ռազմական ժամանակի բոլոր օրենքները եւ իրենց գրոհները կառուցում են ահաբեկչական ձեւչափերով` խաղաղ բնակչության դեմ, որպեսզի սարսափ տարածեն: Բայց այդ պահին Անվտանգության Խորհրդում մենք փոխհամաձայնության չեկանք, այդ պատճառով Ռուսաստանը չպնդեց, որ այդ ցուցակը լրացվի վերոհիշյալ եւս երկու կառույցով` ելնելով բացառապես Սիրիայի Արաբական Հանրապետությունում համատեղ գոնե ինչ-որ բան հնարավորինս արագ սկսելու ցանկությունից», — նշել է Լավրովը:
Արդյունքում «այսօր բավականին լուրջ առաջընթաց կա, պայմանավորվածություն կա այն մասին, որ գործում է ռազմական գործողությունների դադարեցման ռեժիմը», հայտնել է ռուս արտգործնախարարը:
Միաժամանակ, հիշեցրել է Լավրովը, «մեր ամերիկացի գործըներները չեն կարողանում առանձին ընդդիմադիր ջոկատներին առանձնացնել «Ջաբհաթ ան-Նուսրայից», չնայած վաղուց խոստացել են անել դա»:
«Նրանք, ովքեր չեն ուզում հարվածի տակ հայտնվել, պետք է հրաժարվեն այն դիրքերից, որ զբաղեցնում են «Ջաբհաթ ան-Նուսրան» եւ ԻԼԻՊ-ը: Ամեն ինչ շատ պարզ է: Եթե կա հայրենասիրական ընդդիմություն, կառուցողական ընդդիմություն, որն առայժմ ահաբեկիչների կողմից վերահսկվող տարածքներում է, թող այդ կառուցողական ընդդիմությունն այդտեղից հանի իր ջոկատները: Հակառակ դեպքում այն փաստացիորեն կդիտարկվի որպես «Ջաբհաթ ան-Նուսրայի» եւ ԻԼԻՊ-ի հանցակից», — զգուշացրել է Լավրովը:
«Եվ մեր թուրք գործընկերներն այսօր հաստատել են, որ իրենք լիովին համաձայն են այդ տրամաբանությանը», —ճեպազրույցին հայտնել է ՌԴ արտգործնախարարը:
