«Նոր Հայաստան» հանրային փրկության ճակատի անդամ Գագիկ Եղիազարյանի տանն ասյօր՝ հունիսի 30-ին, խուզարկություն է իրականացվել: NEWS.am-ի հետ զրույցում Գագիկ Եղիազարյանը նշեց, որ իր տանը փնտրել են զենք-զինամթերք:
«Առավոտյան 6-ի սահմանում գնացել են մեր տուն, փնտրել են զենք-զինամթերք, քարտեզներ, սխեմաներ, կրիչներ, ինչ-որ հնարավոր է կապել գործ սարքելու հետ, էդ էլ փնտրել են: Բայց դեռ չեն հաջողում գործ սարքել: Ես այդ պահին տանը չեմ եղել, Ազատության հրապարակում էի»,-ասաց նա:
Գագիկ Եղիազարյանը նշեց, որ այսօր իրեն նաեւ զենք-զինամթերք տեղափոխելու գործով կանչել են ցուցմունք տալու. «Ես չհասկացա, թե ինչ ցուցմունք են ուզում, եթե անուններ են տալիս, որոնք ես առաջին անգամ եմ լսում: Երկու հոգու անուն տվեցին, որոնք պայմանավորված նախապես համաձայնեցված զինամթերք են տեղափոխել եւ այլն...ես չեմ կարող մի բանի մասին ցուցմունք տալ, որից տեղյակ չեմ: Արձանագրեցին, որ ես հրաժարվում եմ ցուցմունք տալ, քանի որ օգտվում եմ իմ՝ կասկածյալիս իրավունքներից, բայց այդպես էլ չհասկացա՝ ինձ ինչի մեջ են կասկածում, կամ ինչից ելնելով են կասկածում»:
Նշենք, որ «Նոր Հայաստանը» հայտարարություն էր տարածել, որտեղ ասվում է, որ խուզարկություն է իրականացվել «Նոր Հայաստան» հանրային փրկության ճակատի մի քանի անդամի տանը: