Եվրոպայի Խորհրդի Խորհրդարանական Վեհաժողովի (ԵԽԽՎ) նախագահ, իսպանացի խորհրդարանական Պեդրո Ագրամունթը, որը հայտնի է իր միակողմանի ադրբեջանամետ դիրքորոշմամբ, հրաժարվել է պատասխանել այս տարվա ապրիլյան պատերազմի սկզբում Լեռնային Ղարաբաղի Հանրապետության բնակչության նկատմամբ ադրբեջանական զինված ուժերի իրագործած դաժանությունների մասին NEWS.am-ի հարցին: Իմանալով, որ լրագրողը Հայաստանն է ներկայացնում, նա անմիջապես մոռացել է քաղաքավարի ժպիտի մասին եւ շտապել է տեղեկացնել, որ մոտ ապագայում մամուլի համար հայտարարությամբ հանդես կգա:
Հիշեցնենք, որ 2016-ի ապրիլին մարտական գործողությունների ընթացքում ԼՂՀ-ի Պաշտպանության բանակի զինծառայողների սպանության եւ ադրբեջանցի զինծառայողների կողմից նրանց մարմինները ծաղրելու փաստով քրեական 6 գործ է հարուցվել: Փորձաքննության արդյունքների համաձայն, Քյարամ Սլոյանը եւ Հրանտ Ղարիբյանը գլխատվել են մահվանից հետո: Հայկ Թորոյանը գլխատվել է, երբ ողջ է եղել: Հանցագործները նաեւ կտրել են զինծառայողի ձեռքերը: Հրանտ Ղարիբյանի եւ Հայկ Թորոյանի գլուխները մինչեւ հիմա չեն վերադարձվել: Ռաֆիկ Հակոբյանի, Աղասի Ասատրյանի, Անդրանիկ Զոհրաբյանի, Ռոբերտ Աբաջյանի, Ալեքսան Առաքելյանի, Օնիկ Գրիգորյանի, Ռոման Պողոսյանի, Սուրեն Մելքումյանի, Մաքսիմ Գրիգորյանի, Ժորա Եսայանի, Բագրատ Ալեքսանյանի, Բորիս Օզմանյանի, Գրիգոր Հարությունյանի, Ադամ Սահակյանի, Անդրանիկ Գրիգորյանի ականջներն են կտրված եղել: Արման Անդրեասյանի աջ ականջն է կտրված եղել, կտրվածքներ են եղել կրծքին: Ազատ Սիմոնյանի աջ ձեռքի մատն է կտրված եղել: Աշոտ Շահբազյանի ձախ աչքն են հանել:
