Մոսկվան պետք է համապատասխան կերպով արձագանքի Լեհաստանում ՆԱՏՕ-ի հակահրթիռային պաշտպանության համակարգի տեղակայմանն ու դաշինքի զորակազմի թվի ավելացմանը: Ըստ ՌԻԱ Նովոստիի, Ֆինլանդիայի ղեկավար Սաուլի Նիիստեի հետ համատեղ մամուլի ասուլիսում այս մասին հայտարարել է Ռուսաստանի նախագահ Վլադիմիր Պուտինը:
«Հիմա խոսում են Լեհաստանի տարածքում ռադարների եւ հակահրթիռների նույնպիսի համակարգի տեղակայման մասին, իսկ դա արդեն Բալթիկ ծովի տարածաշրջանն է: Ի՞նչ պետք է մենք անենք: Ինչպե՞ս դիմակայենք այդ սպառնալիքներին: Մենք պետք է համապատասխան կերպով արձագանքենք: Հիմա էլ հայտարարվում է, որ ավելացվելու է ՆԱՏՕ-ի զորակազմի թիվը Մերձբալթյան երկրներում: Մեր սեփական տարածքում մեր զորքերի տեղաշարժն ագրեսիվ գործողության տարր է հայտարարվում, իսկ մեր սահմանների մոտ ՆԱՏՕ-ի զորավարժությունները, չգիտես ինչու, այդպիսին չի համարվում: Կարծում ենք՝ դա անարդար է»,- ասել է Պուտինը: