Ռուսաստանը կհարգի Ֆինլանդիայի ընտրությունը, բայց ՆԱՏՕ-ին այդ երկրի անդամակցության դեպքում ստիպված կլինի արձագանքել: Ֆինլանդիայի նախագահ Սաուլի Նիինիստյոյի հետ համատեղ մամուլի ասուլիսում այս մասին հայտարարել է ՌԴ նախագահ Վլադիմիր Պուտինը:
«Ի՞նչ եք կարծում, մենք շարունակելու ենք նույն կե՞րպ գործել: Սահմանից 1.5 հազար կիլոմետր հեռացրել ենք մեր զորքերը, դրանք այդպես էլ մնալու են այնտե՞ղ»,- հայտարարել է նա:
Ըստ ՏԱՍՍ-ի, Ռուսաստանի ղեկավարը հիշեցրել է, որ Ֆինլանդիայի հետ սահմանից զորքերի հեռացման մասին որոշումն ընդունվել է՝ նաեւ Ֆինլանդիայի չեզոքությունը հաշվի առնելով:
«Վերաձեւակերպեմ իմ ֆինն ընկերներից մեկի հայտարարությունը. կարող էի ասել, որ ՆԱՏՕ-ն, հավանաբար, մինչեւ վերջին ֆինն զինվորի մահը հաճույքով կպատերազմեր Ռուսաստանի հետ: Ձեզ դա պե՞տք է: Մեզ՝ ոչ, մենք չենք ուզում: Իսկ դուք ինքներդ որոշեք»,- ասել է Պուտինը:
