ԱՄՆ-ը ստիպված մի շարք զիջումներ է անում Ռուսաստանին Սիրիայի առումով ռազմական համագործակցության մասին նոր համաձայնագրի իր առաջարկում, հայտնել է հետախուզավերլուծական Stratfor ընկերությունը:
Ամերիկյան Washington Post պարբերականը հայտնել է, որ ԱՄՆ-ի նախագահ Բարաք Օբաման Ռուսաստանին առաջարկել է նոր համաձայնագիր կնքել Սիրիայում ահաբեկչության դեմ պայքարում համագործակցության վերաբերյալ: Ամերիկյան իշխանություններն իրենց կողմից խոստանում են Սիրիայի տարածքում իրենց ուժերը միավորել ՌԴ ՌՏՈՒ-ի հետ երկրի նախագահ Բաշար Ասադի դեմ գործող «Ջաբհաթ ան-Նուսրա» ահաբեկչական կազմակերպության դեմ պայքարն ավելի լավ համակարգելու համար: Փոխարենը Ասադի վարչակարգը ցանկանում է, որ Ռուսաստանը Ասադի կառավարությանը համոզի վերջ դնել ԱՄՆ-ի աջակցությունը վայելող ապստամբներին ռմբակոծելուն:
«Հունիսի 27-ին արված առաջարկը Վաշինգտոնի փորձն է` փոխել Սիրիայում ստեղծված պայմանները եւ խուսափել հետագա լարումից: Այդ առաջարկը Ռուսաստանին որոշ զիջումներ է ենթադրում: Առաջինը ռուս զինվորականների հետ ակտիվ համագործակցությունն է, նույնիսկ թիրախների մասին տվյալների փոխանակումը: Մոսկվան մի որոշ ժամանակ պահանջում էր գնալ այդ քայլին, որովհետեւ դա վերջ կդնի Ռուսաստանի մեկուսացմանը եւ Վաշինգտոնի հետ երկխոսության կմղի», — գրում է Stratfor-ը:
Պենտագոնի ղեկավար Էշթոն Կարտերը հանդես էր գալիս այդ զիջումների դեմ` վախենալով, թե աստիճանաբար կնվազի այն ճնշումը, որ ԱՄՆ-ն եւ իր դաշնակիցները Ուկրաինայում եւ այլ վայրերում իրադարձությունների հետեւանքով գործադրում են Ռուսաստանի վրա, հայտնում է «ՌԻԱ Նովոստին»: