Ավիատոմսերի գներն ինչքան մրցունակ են լինում, այնքան լավ պայմաններ են ստեղծվում զբոսաշրջության համար: Այս մասին այսօր՝ հուլիսի 6-ին, NEWS.am-ի հետ զրույցում ասաց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը՝ անդրադառնալով Վերին Լարսի անցակետի փակվելուց հետո ավիատոմսերի գների բարձրացման խնդրին:
Նա նշեց, որ դեռեւս պարզ չէ, թե որքանով է զբոսաշրջության վրա ազդել Վերին Լարսի անցակետի փակվելուց հետո ավիատոմսերի գների բարձրացումը. «Այս պահին գնահատել, թե որքանով ազդեց զբոսաշրջության վրա մի քանի օրվա ընթացքում գնային տատանումը, դժվար կլինի: Իհարկե, ընդհանրապես, որքան մրցունակ գներ են լինում, այնքան լավ պայմաններ են ստեղծվում զբոսաշրջության համար: Բայց թե արդյոք այս տատանումն ազդեցություն ունեցել է, թե ոչ, պարզ կլինի եռամսյակային տվյալներն ամփոփելուց հետո»:
Դիտարկմանը, թե արդյոք ավիատոմսերի 2-2,5 անգամ թանկացումից հետո ռուս զբոսաշրջիկների հոսք կլինի դեպի Հայաստան, Ապրեսյանը պատասխանեց, որ վերջին ամիսների մասին ոչինչ չի կարող ասել, բայց այս տարվա առաջին եռամսյակի տվյալներով, դեպի Հայաստան ռուս զբոսաշրջիկների հոսքն ավելացել է նախորդ տարվա նույն ժամանակաշրջանի համեմատությամբ. «Առաջին եռամսյակի տվյալներով այս տարի 8.6 տոկոսով աճ է արձանագրվել զբոսաշրջության ոլորտում նախորդ տարվա նույն ժամանակահատվածի համեմատ, այս պահին էլ ռուս զբոսաշրջիկների հոսք կա, սակայն, դեռ հստակ թվեր չենք կարող ասել»:
Նշենք, որ ավիատոմսերի գները Վերին Լարսի փակվելուց հետո (հունիսի 23) շուրջ կրկնակի թանկացել են: Օրինակ՝ դեպի Սոչի ավիատոմսի արժեքը հասել է 120 հազար դրամի, միակ ընկերությունը, որ ուղիղ չվերթ է իրականացնում այդ ուղղությամբ, «Աերոֆլոտն» է: Դեպի Կրասնոդար ավիատոմսի արժեքը հասել է 150 հազար դրամի, այդ ուղղությամբ չվերթներ են իրականացնում միայն «Ուրալը» եւ «Յուտեյր Արմենիան»:
Այս առնչությամբ Հայաստանի քաղավիացիայի գլխավոր վարչության նախկին պետ Շահեն Պետրոսյանը NEWS.am-ին հայտնել էր, որ ռուսական ընկերությունները կոնկրետ ուղղություններով ավիափոխադրումներ իրականացնելու մենաշնորհ ունեն, եւ օգտվելով հանգամանքից, որ Վերին Լարսի անցակետը փակվել է, թանկացնում են ավիատոմսերի գները:
