Ապրիլյան պատերազմում վիրավորված երկու զինծառայող դեռեւս շարունակում է բուժումը վերակենդանացման բաժանմունքում: Այս մասին NEWS.am-ի թղթակցին ասաց ՀՀ ՊՆ Կենտրոնական կլինիկական զինվորական հոսպիտալի պետ Արամ Ասատուրյանը:
Խոսքը Ռոլանդ Սահակյանի եւ Ավետիս Զարգարյանի մասին է, որոնք շուրջ 100 օր է՝ բուժվում են հոսպիտալում:
Ավետիս Զարգարյանը վիրավորվել է ապրիլի 4-ին ադրբեջանական ագրեսիայի հետեւանքով. Թալիշում մարտերի ընթացքում գնդակը մտել էր նրա ծնոտը, թիկունքով ներքեւ էր իջել, վնասել էր մի քանի ող եւ ողնուղեղը: Երբ Ավետիսին Երեւան էին տեղափոխում, բժիշկները հույս չէին տալիս, սակայն 19-ամյա տղան կարողացավ բոլորին ապացուցել իր ուժը: Այսօր զինծառայողը դանդաղ ապաքինվում է:
Բժիշկները սպասում են՝ Ավետիսը մի քիչ կազդուրվի, որից հետո կվիրահատեն:
Ռոլանդ Սահակյանը նույնպես վիրավորվել է ապրիլի 4-ին Թալիշում: Հոսպիտալում գտնվելու ընթացքում երիտասարդը 6 վիրահատության է ենթարկվել. երկու թոքերի, լեղապարկի, լյարդի, 12-մատնյա աղիքի եւ ողնաշարի: Հունիսի վերջին Ռոլանդը տեղափոխվել էր հիվանդասենյակ, սակայն օրեր անց վիրահատվել եւ կրկին տեղափոխվել Վերակենդանացման բաժանմունք: Նրա վիճակը կայուն է: Ռոլանդն արդեն կարողանում է ինքնուրույն ուտել: Իհարկե, նա մինչեւ հիմա բարձր ջերմություն ունի, սակայն ձեռքերը նորմալ աշխատում են. ողնաշարի վնասվածքը դրանց վրա չի ազդել: Ռոլանդին մկանները մերսող մասնագետ է այցելում, որոնք երկար ժամանակ պառկելու արդյունքում թուլանում են եւ կորցնում տոնուսը:
Ռոլանդն Արմավիրի մարզից է, ծնողները գյուղատնտեսությամբ են զբաղվում: Ամեն օր Սահակյանները տաքսիով գալիս են Երեւան, վերադառնում:
Նշենք, որ այս զինծառայողներին արտերկիր տեղափոխելու համար Պաշտպանության նախարարությունն արդեն ինչքան ժամանակ է՝ արտասահմանյան մի քանի կլինիկաների հետ բանակցություններ է վարում` հասկանալու, թե նրանք ինչ կարող են առաջարկել Ռոլանդ Սահակյանին եւ Ավետիս Զարգարյանին:
Հայաստանի Պաշտպանության նախարարության ռազմաբժշկական վարչության պետ, գնդապետ Կամավոր Խաչատրյանի խոսքով, Պաշտպանության նախարարության աշխատակիցներն արդեն փաստաթղթերն ու վիրավոր տղաների մասին բոլոր տվյալներն ուղարկել են լավ համբավ ունեցող մի քանի կլինիկա, որոնք ֆիզիոթերապեւտիկ բուժման եւ վիրահատության ոլորտում լավ համբավ ունեն, եւ այժմ նրանցից պատասխան են սպասում: Երբ պարզ դառնա, թե տղաներին ճշգրիտ ինչ բուժում կարող են առաջարկել այդ կլինիկաներում եւ ինչ գնով, տեղեկությունների ամբողջական փաթեթը կուղարկվի Առողջապահության նախարարության ստեղծած հատուկ հանձնաժողով, որը որոշում է կայացնում վիրավոր զինվորների բուժումն արտասահմանում կազմակերպելու մասին Հայաստանում այն կազմակերպելու անհնարինության պատճառով:
Հիշեցնենք նաեւ, որ ապրիլյան իրադարձություններից հետո Հայաստանի կառավարությունը որոշում է կայացրել այն մասին, որ վիրավորները, որոնց չեն կարողանա Հայաստանում պատշաճ օգնություն տրամադրել, բուժման կուղարկվեն արտսահման բյուջետային միջոցներով:
Սակայն մինչ օրս այդ որոշումը չի կիրառվել որեւէ զինվորի նկատմամբ: Գերմանիայում գտնվող Արամ Լազգիյանը եւ Ռուբեն Առաքելյանը այժմ Գերմանիայում բուժում են ստանում, բայց դրա գումարը հավաքվել է մասնավոր նվիրատվությունների միջոցով:
