Աշխարհագրական առումով Հայաստանի հեռանկարային շուկաները գտնվում են ոչ թե Ռուսաստանում, այլ ավելի շատ Մերձավոր Արեւելքում եւ Եվրոպայում: Այս մասին, այսօր՝ հուլիսի 16-ին, լրագրողների հետ հանդիպման ժամանակ նշել է տնտեսագետ Աշոտ Եղիազարյանը՝ հավելելով, որ դա նշանակում է, որ Հայաստանի տրանսպորտային ուղիները պիտի ինտեգրված լինեն այդ տարածքներին:
«Հայաստանում քիչ բան է փոխվել, հարեւան երկրներում՝ շատ: Նրանք ունեն այլընտրանքային հնարավորություններ, ինտեգրված են այլ տնտեսական տարածքների, Հայաստանն ապրում է խորհրդային ռեժիմով, դա արգելակում է Հայաստանի զարգացումը, իսկ երկաթգիծը Հայաստանի համար անհրաժեշտ գործոն է»,-ասաց նա՝ շարունակելով, որ տրանսպորտային հնարավորությունների սահմանափակ լինելու պատճառով Հայաստանը ոչ գրավիչ երկիր է դառնում նաեւ ներդրումների առումով:
Անդրադառնալով Իրանի նկատմամբ պատժամիջոցները հանելուն, տնտեսագետը նշեց, որ փոփոխություններ է առաջացրել տարածաշրջանում. «Այս տարածաշրջանում աշխարհաքաղաքական, աշխարհատնտեսական իրավիճակը փոխվում է՝ կապված Իրանի, Արեւմուտքի ազդեցությամբ: Սա ենթադրում է, որ ձեւավորվելու են տրանսպորտային նոր ուղիներ, ստեղծվելու են միջազգային տրանսպորտային ուղիներ: Ռուսաստանը շահագրգռված չէ, որ Իրանը ներքաշվի տրածաշրջանային գործարքների մեջ, սակայն, անկախ նրա ցանկությունից, Իրանի հետ պետք է հաշվի նստել, եւ Իրանը տարածաշրջանում նոր հնարավորություններ է ստեղծում»:
Աշոտ Եղիազարյանի խոսքով, Իրանը շահագրգռված է Սեւ ծովի միջոցով դուրս գալ եվրոպական շուկաներ, ԵՄ-ն նույնպես շահագրգռված է դուրս գալ Իրան Կովկասի միջոցով. «Այս առումով Հայաստանն ու Վրաստանը դառնում են այդ միջանցքի կարեւոր օղակները: Պատահական չէ, որ ներգրավվում են սեւծովյան այլ երկրներից Բուլղարիան, Հունաստանը: Ըստ էության, Եվրամիության եւ Մերձավոր Արեւելքի արանքում ստեղծվում է տնտեսական ենթատարածաշրջան»,-ասաց նա նկատի ունենալու Պարսից ծոցը Սեւ ծովին կապող տրանսպորտային միջանցքը՝ Իրան-Հայաստան-Վրաստան-Բուլղարիա-Հունաստան երթուղով:
