Դեռեւս որոշված չէ՝ հուլիսի 14-ին Նիսում ահաբեկչության հետեւանքով սպանված հայուհու մարմինը կտեղափոխվի Հայաստան, թե ոչ: Այս մասին NEWS.am-ի հետ զրույցում ասաց Հայ եկեղեցու Նիսի հոգեւոր հովիվ Հայր Գրիգոր աբեղա Խաչատրյանը։
«Փորձաքննություններ են նշանակվել, դեռեւս մարմինը հարազատներին չեն հանձնել: Ամուսինն էլ այս պահին չի որոշել, թե որտեղ են հուղարկավորելու կնոջը»,- ասաց նա:
Հայր Գրիգորը հայտնեց, որ հուլիսի 17-ին Նիսում Ֆրանսիայում Հայոց թեմի առաջնորդ, Գերաշնորհ տեր Վահան եպիսկոպոս Հովհաննեսյանի մասնակցությամբ հոգեհանգստյան պատարագ է մատուցվել. «Այնուհետեւ հավատացյալների հետ ծաղիկներ ենք դրել՝ ի հիշատակ զոհերի»:
Նշենք, որ ահաբեկչության հետեւանքով երկու հայ է զոհվել: Նրանցից մեկը՝ 34-ամյա Մ. Գ.-ն Հայաստանի քաղաքացի էր, մի քանի տարի առաջ էր տեղափոխվել Ֆրանսիա, ամուսնացած էր, մանկահասակ երեխա ուներ: Մյուսը Ռոման Եկմալյանն էր, Վրաստանի քաղաքացի, որը Նիս էր մեկնել՝ հանգստանալու նպատակով:
Հիշեցնենք, որ հուլիսի 14-ի երեկոյան բեռնատարի վարորդը մխրճվել էր մարդկանց բազմության մեջ, որոնք հավաքվել էին Նիսի Անգլիական ափին՝ Բաստիլի գրավման օրվան նվիրված հրավառությունը դիտելու։ Ականատեսների վկայությամբ՝ բեռնատարը, 2 կմ զիգզագաձեւ ընթացքով անցնելով, ճզմել է մարդկանց։ Վարորդը սպանվել էր ոստիկանական ուժերի կողմից։ Ֆրանսիայի նախագահ Ֆրանսուա Օլանդը հարձակումը ահաբեկչություն է որակել։
Պաշտոնական տեղեկություններով՝ հարձակման հետեւանքով 84 մարդ է զոհվել, այդ թվում՝ 10 երեխա: Ըստ Փարիզի դատախազության՝ ահաբեկչության հետեւանքով տուժել է 202 քաղաքացի: Նրանցից 52-ը ծայրահեղ ծանր վիճակում են, 25-ն էլ վերակենդանացման բաժանմունքում: