Եվրամիությունը խստորեն դատապարտում է Թուրքիայում հեղաշրջման փորձը եւ հաստատում է երկրի լեգիտիմ կառույցներին իր աջակցությունը։ Այս մասին ասված է Թուրքիայում կատարված դեպքերի կապակցությամբ ԵՄ հայտարարության մեջ։
ԵՄ–ն ցավում է մեծաքանակ զոհերի կապակցությամբ եւ համերաշխություն է հայտնում թուրք ժողովրդին։ ԵՄ–ն ողջունում է քաղաքական կուսակցությունների միասնական դիրքորոշումը՝ հանուն հետագա բռնության կանխման եւ հանգստության վերականգնման։
ԵՄ–ն կոչ է անում պահպանել Թուրքիայում սահմանադրական կարգը եւ ընդգծում է օրենքի գերակայության կարեւորությունը։ Ծայրահեղ կարեւոր է, որ ապահովվի երկրի բոլոր ժողովրդավարական ինստիտուտների, այդ թվում՝ կառավարության եւ խորհրդարանի նկատմամբ հարգանքը։
ԵՄ–ն ընդգծում է ժողովրդավարության, մարդու իրավունքների եւ հիմնարար ազատությունների նկատմամբ հարգանքի անհրաժեշտությունն ու յուրաքանչյուրի՝ արդար դատական հետաքննություն ունենալու իրավունքը՝ մարդու իրավունքների եւ հիմնարար ազատությունների մասին Եվրոպական կոնվենցիայի համապատասխան, ներառյալ № 13 արձանագրությունը մահապատժի չեղարկման մասին։ Այդ համատեքստում ԵՄ–ն հիշեցնում է, որ մահապատժից միանշանակ հրաժարվելը ԵՄ կարեւորագույն տարրերից մեկն է։
Թուրքիան ԵՄ անդամակցության թեկնածու է եւ առանցքային գործընկեր։ ԵՄ–ն նախկինի պես հավատարիմ է ժողովրդավար եւ կայուն Թուրքիայի հետ համատեղ աշխատելուն։