Եթե բերման ենթարկված քաղաքացիների նկատմամբ եղել է անհիմն ֆիզիկական ուժի գործադրում, անպայման, կպատժվեն։ Այս մասին NEWS.am-ի հետ զրույցում ասաց ոստիկանապետի առաջին տեղակալ Հունան Պողոսյանը՝ պատասխանելով մեր այն հարցին, թե ինչո՞ւ են ոստիկանները բռնություն գործադրել քաղաքացիների նկատմամբ։
«Եթե եղել է ֆիզիկական ուժի անհիմն գործադրում, անպայման կպատժվեն, իսկ որքանո՞վ է նպատակահարմար ու ճիշտ, որ իրենց մարտական ընկերոջը կորցրած ոստիկանին սկսում են հայհոյել»,-ասաց Հունան Պողոսյանը։
Հարցին՝ դրա՞ համար են զանգվածաբար բերման ենթարկում քաղաքացիներին, Պողոսյանն արձագանքեց. «Ոչ, բացարձակ, ոչ։ Հասարակական կարգի խախտման ժամանակ բերման են ենթարկել, եւ եթե ոստիկանը սխալ է եղել, ցանկացած պարագայում ոստիկանը պատժվում է»,-նշեց փոխոստիկանապետը։
Նշենք, որ ՊՊԾ գնդի վրա զինված հարձակում գործած «Սասնա ծռեր» խմբի անդամների վրա չգրոհելու պահանջով փողոց դուրս եկած քաղաքացիները մայրաքաղաքի տարբեր հատվածներից բերման էին ենթարկվում, ինչն ուղեկցվում էր բռնություններով եւ բախումներով։