Կոտայքի մարզի բնակչուհի Բավական Խ.-ն մեղադրվում է մարդու թրաֆիքինգի կամ շահագործման մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ նախկինում դատապարտված Բավականը հավաքագրել եւ Դուբայ է տեղափոխել Թեհմինե Ա.-ին, ապա փոխանցել Նելլի Ն.-ին, որի դիմաց ստացել է 600 ԱՄՆ դոլար:
Պարզվում է, որ Բավականը եղել է Նելլի Ն.-ի կազմակերպած խմբի անդամ, որը Հայաստանում կանանց է հավաքագրել եւ նրանց տեղափոխել ԱՄԷ: Այսպիսով, 2008թ. փետրվարին, Հրազդանում խաբեության միջոցով՝ Դուբայում հագուստի առեւտրով համատեղ զբաղվելու կեղծ առաջարկով, իրականում, սակայն, հանցավոր խմբի անդամների կողմից սեռական շահագործման ենթարկելու նպատակով, հավաքագրել է Թեհմինե Ա.-ին: Այնուհետեւ մարտի 1-ին Թեհմինեն մեկնել է Դուբայ:
Թեհմինեին Դուբայում դիմավորելուց հետո հանցավոր խմբի ղեկավար Նելլի Ն.-ն Բավականին է ուղարկել 600 ԱՄՆ դոլար: Նելլին վերցրել է Թեհմինեի անձնագիրը եւ ստիպել նրան մինչեւ 2009թ. մայիս ենթարկել սեռական շահագործման՝ ստանալով այդ կերպ նրա վաստակած գումարները:
Բավական Խ.-ին մեղադրանք է առաջադրվել Քրեական օրենսգրքի 132-րդ հոդվածի 3-րդ մասի 1-ին կետով:
Գործը քննվում է Կոտայքի մարզի ընդհանուր իրավասության դատարանում:
