Ռուսաստանն ու ՆԱՏՕ-ն պետք է երկխոսություն վարեն, իսկ սառը պատերազմը պետք է անցյալում մնա: Նման տեսակետ է հայտնել դաշինքի գլխավոր քարտուղար Յենս Սթոլթենբերգը հուլիսի 19-ին իսպանական El País թերթի համար հրապարակված հոդվածում:
«Ահաբեկչությունը ու անկայունությունը սպառնալիքներ են, ու ՆԱՏՕ-ում բոլոր դաշնակիցները աշխատում են մեր երկրներում անվտանգությունը պահպանելու համար,- ասել է գլխավոր քարտուղարը,- Եվրոպայի անվտանգությունը երկարաժամկետ հեռանկարում ամրապնդելու արմատական միջոց է Ռուսաստանի՝ մեր ամենամեծ ու ամենաուժեղ հարեւանի հետ իրական երկխոսությունը»:
«Հավաքական պաշտպանությունը ՆԱՏՕ-ի գլխավոր պարտականությունն է,- շեշտել է Սթոլթենբերգը,- Գրեթե մեկ միլիարդ մարդ հավատում է, որ մենք կապահովենք նրանց անվտանգությունը»: «Վարշավայում առաջնորդները պայմանավորվել են ավելացնել ռազմական ներկայությունը դաշինքի արեւելյան անդամ պետություններում»,- հիշեցրել է գլխավոր քարտուղարը: «Ոմանք մտավախություններ ունեն, որ այդ քայլերը կհանգեցնեն էսկալացիայի ու Ռուսաստանի կողմից պատասխան քայլերի, նշել է գլխավոր քարտուղարը,- Ես հասկանում եմ այդ մտահոգությունը, բայց չեմ կիսում այն»:
«Մենք չենք ուզում պատերազմ հրահրել, մենք ուզում ենք կանխել այն,- հավաստիացնում է Սթոլթենբերգը,- Մեր բոլոր գործողությունները պաշտպանական են, համաչափ, թափանցիկ ու ընդունվում են մեր միջազգային պարտավորությունների համապատասխան»: Նրա խոսքով, ՆԱՏՕ-ի նպատակն է «դիմակայել արտաքին վտանգին»: «Մենք սպառնալիք չենք Ռուսաստանի կամ որեւէ այլ երկրի համար»,- վստահեցրել է դաշինքի գլխավոր քարտուղարը,- Մենք չենք ձգտում առճակատման կամ սպառազինությունների մրցավազքի նոր ալիքի»:
Սթոլթենբերգը հավելել է, որ «սառը պատերազմը անցյալում է ու պետք է այնտեղ էլ մնա»: «Ռուսաստանի հետ երկխոսությունը կարեւոր նշանակություն ունի ռազմավարական կայունությանն ու թափանցիկությանն աջակցելու տեսակետից»: Ինչպես ավելի վաղ հայտարարել էր Սթոլթենբերգը՝ դաշինքը որոշում է կայացրել չորս գումարտակ տեղակայել Մերձբալթյան երկրներում ու Լեհաստանում: Նրա խոսքով, խոսքը դաշինքի արեւելյան մասում ռազմական ներկայության ընդլայնման մասին է ՝ Լեհաստանում, Լիտվայում, Լատվիայում ու Էստոնիայում ռոտացիոն հիմունքներով չորս գումարտակ տեղակայելու միջոցով, փոխանցում է ՏԱՍՍ-ը:
