Արժույթի միջազգային հիմնադրամը 2017-2018թթ. իջեցրել է համաշխարհային տնտեսության աճի կանխատեսումները ԵՄ–ից Մեծ Բրիտանիայի դուրս գալու հանրաքվեի արդյունքների պատճառով։
Հիմնադրամի կանխատեսումներով՝ համաշխարհային տնտեսությունը 2016-ին 3.1 տոկոսով աճ կգրանցի՝ ի տարբերություն ապրիլյան կանխատեսումների, որոնց համաձայն՝ աճն ակնկալվում էր 3.2 տոկոսի չափով։ 2017-ին աճը կանխատեսվում է 3.4 տոկոսի չափով, ապրիլին այդ ցուցանիշը 3.5 տոկոս էր։
Կանխատեսումները դեռեւս աննշան են նվազել, քանի որ «Բրեքսիթի» ռիսկերը համաշխարհային տնտեսության մեջ գնահատելը դժվար է։ Ապագայում կանխատեսումը կարող է վերանայվել, հայտնում է BBC–ն։
ԱՄՀ–ն նվազեցրել է Մեծ Բրիտանիայի տնտեսության աճի կանխատեսումները։ Այս տարի Բրիտանիայում ՀՆԱ–ն կաճի 1.7 տոկոսով (ապրիլին 1.9 տոկոս էր), իսկ եկող տարի՝ 1.3 տոկոսով (ապրիլին 2.2 տոկոս էր)։
Եվրոգոտու համար ԱՄՀ–ն աճի կանխատեսումները նվազեցրել է միայն եկող տարվա համար։ Եվրոպական երկրների ՀՆԱ–ն կաճի ընդամենը 1.4 տոկոսով, չնայած ապրիլին ֆոնդում 1.6 տոկոս աճ էին կանխատեսում։
ԱՄՀ–ն «Բրեքսիթի» հարցում նաեւ բացասական սցենարներ ունի, որոնց կհանգեցնեն համաշխարհային տնտեսության մեջ լուրջ կորուստների։ Դրանք վերաբերում են հիմնականում ԵՄ–ի եւ Մեծ Բրիտանիայի միջեւ բանակցությունների ձախողմանը, ինչը կարող է հանգեցնել միջազգային առեւտրային համաձայնագրերի խզմանը եււ ֆինանսական շուկաներում խուճապի։