Սարի թաղում բախում է գրանցվել քաղաքացիների եւ ոստիկանների միջեւ։ Այս մասին լրագրողներին հայտնեցին Խորենացի փողոցի՝ պահպանվող տարածքում ծառայություն իրականացնող ոստիկանները: Նրանց փոխանցմամբ՝ երեք ոստիկան վիրավորվել է:
Սարի թաղի կողմից քաղաքացիներ են եկել, փորձել են մուտք գործել պահպանվող տարածք։ Նրանք նաեւ քարեր եւ տարբեր առարկաներ են նետել ոստիկանների ուղղությամբ:
Մինչ այդ Խորենացի փողոցում հավաքվածները պահպանվող տարածքից դուրս եկող շտապօգնության երկու մեքենա են տեսել: Սակայն շտապօգնությունում հերքել էին, որ վիրավորներ կան՝ պարզաբանելով, որ վատացել է այդ տարածքում բնակվող որոշ քաղաքացիների ինքնազգացողությունը:
Դեպքի վայրում են նաեւ Հայաստանի ոստիկանապետի տեղակալներ Սամվել Հովհաննիսյանը եւ Լեւոն Երանոսյանը, ինչպես նաեւ Երեւանի ոստիկանապետ Աշոտ Կարապետյանը: Նրանք հայտնեցին, որ բախման հետեւանքով քաղաքացիներ չեն տուժել, այս պահի դրությամբ բերման ենթարկվածներ չկան։
