«Արեւիկ» ազգային պարկի տարածքում այսօր՝ հուլիսի 20-ին՝ ժամը 06:30-ին, հրդեհաշիջման աշխատանքները վերսկսվել են:
Հայաստանի ԱԻՆ-ի փոխանցմամբ, դեպքի վայր է մեկնել մեկ մարտական հաշվարկ:
Հիշեցնենք, որ հուլիսի 13-ին՝ ժամը 14։43-ին, ահազանգ էր ստացվել, որ Սյունիքի մարզի Արաքսաշեն գյուղին հարակից հանդամասում այրվում է խոտածածկ տարածք:
Պարզվել էր, որ այրվում է մոտ 100 հա խոտածածկույթ, որից 2,5 հա՝ «Արեւիկ» ազգային պարկի տարածքում:
Ավելի ուշ հրդեհն ընդգրկել էր 200 հա տարածք:
Հրդեհաշիջման աշխատանքներին մասնակցել էին թիվ 56 ՀՓՋ-ից 22 հրշեջ-փրկարար, Մեղրիի ՈԲ-ից 7 աշխատակից, «Արեւիկ» ազգային պարկի 13 եւ «Մեղրի ՃՇՇ»-ի 6 աշխատակից:
Տեղեկատվություն էր ստացվել, որ հրդեհի օջախը գտնվում է անանցանելի, ժայռոտ հատվածում։ Դեպքի վայր էր մեկնել մեկ մարտական հաշվարկ, մարզային փրկարարական վարչության օպերատիվ խումբը, «Արեւիկ» ազգային պարկի 25 աշխատակից, ՀՀ ՊՆ թիվ N զորամասի 50 զինծառայող եւ տեղի 15 բնակիչ:
Նշենք, որ այս 7 օրերի ընթացքում ԱԻՆ-ը պարբերաբար հաղորդել է հրդեհը մարված լինելու մասին, սակայն հետո պարզվել է, որ այն նորից բռնկվել է: