Հնարամիտ խաղացողները սկսել են Pokemon Go–ում իրենց լոգիններն ու գաղտնաբառերը հազարավոր դոլարներով վաճառել eBay-ում, հայտնում է The Independent–ը:
eBay ինտերնետային աճուրդում հայտնվել են հայտարարություններ պոկեմոնների զանազան վիրտուալ հավաքածուների իրական վաճառքի մասին: Չնայած հաշիվների վաճառքը հակասում է Pokemon Go –ի կանոններին ու այդ խաղն անիմաստ դարձնում, բայցեւայնպես դա չի կանգնեցնում ոչ վաճառողներին, ոչ էլ գնորդներին:
Հաշվի գինը կախված է ոչ միայն պերսոնաժի մակարդակից, այլեւ խաղացողի հավաքածուում գտնվող պոկեմոնների քանակից ու որակից: Գները կարող են տատանվել մի քանի դոլարից մինչեւ մի քանի հազար դոլար՝ լոգինի ու գաղտնաբառի համար:
The Independent-ի տեղեկություններով, eBay-ի օգտատերերից մեկին արդեն հաջողվել է վաճառել իր հաշիվը 1.5 հազար դոլարով: «Դուք գնում եք իմ հաշիվը, որի մեջ ես իմ ժամանակն ու իմ ուժերն եմ ներդրել: Ես ձեզ համար շատ հեշտացրել եմ խաղի ընթացքը,- հայտնել է վաճառքի մասին հայտարարությունում պոկեմոնի վարպետը,- Ես ընդամենը աղքատ ուսանող եմ ու մինչեւ ականջներիս ծայրը խրված եմ պարտքերի մեջ, ինձ համար կարեւոր է յուրաքանչյուր կոպեկը»:
eBay-ը ձգտում է պայքարել նման հայտարարությունների դեմ, ու մաքրում իր ռեսուրսը դրանցից:
Pokemon GO-ն Android-ի ու iOS-ի բազայով գաջետների համար նախատեսված խաղ է ՝ լրացուցիչ իրականության տարրերով, որը թողարկվել է հուլիսի 6-ին: Խաղացողները տեղաշարժվում են քաղաքում իրենց սմարթֆոններով, փնտրում պոկեմոններին ու որսում նրանց: Որսացած պերսոնաժներինն կարելի է մարզել, իսկ հետո պայքարել մյուս խաղացողների դեմ: