Հուլիսի 19-ի լույս 20-ի գիշերը հարազատների կողմից անգիտակից, ծայրահեղ ծանր վիճակում Վանաձորի բժշկական կենտրոն է տեղափոխվել Վանաձորի բնակչուհի, 36-ամյա Նառա Ա.-ն: Տեղում պարզվել է, որ վերջինս սունկ է կերել եւ դրանից թունավորվել է:
NEWS.am-ի թղթակիցը հաղորդում է, որ կնոջը տեղափոխողները պատմել են, որ նրա հետ սունկ է կերել նաեւ հայրը՝ 54-ամյա Գառնիկ Ա.-ն, որն ուտելուց անմիջապես հետո գնացել է աշխատանքի: Գառնիկն աշխատում է որպես պահակ քաղաքի կազմակերպություններից մեկում:
Բժշկական կենտրոնի ընդունարանի բուժքույրն անհանգստացել ու փորձել է հեռախոսազանգով ճշտել նաեւ Գառնիկի վիճակը: Վերջինս, սակայն, հետախոսազանգերին չի պատասխանել: Անհանգստացած հարազատները բժշկական կենտրոնի բժիշկների հորդորով անմիջապես մեկնել են նրա աշխատանքի վայր ու Գառնիկին գտել անգիտակից վիճակում ընկած: Նրան անմիջապես տեղափոխել են բժշկական կենտրոնի վերակենդանացման բաժանմունք:
Կենտրոնի բժիշկների օպերատիվ աշխատանքի շնորհիվ հայր ու դուստր դուրս են բերվել ծայրահեղ ծանր վիճակից:
Ներկայումս նրանք շարունակում են գտնվել կենտրոնի վերակենդանացման բաժանմունքում, վիճակը գնահատվում է կայուն ծանր:
