Պետք է օր առաջ զենքը վայր դնել ու գտնել հարցի լուծման խոհեմ ճանապարհ: Այս մասին, այսօր՝ հուլիսի 19-ին լրագրողների հետ հանդիպմանն ասաց բանաստեղծ Դավիթ Գասպարյանը` անդրադառնալով հուլիսի 17-ին «Սասնա ծռեր» խմբի կողմից ոստիկանության պարեկապահակային ծառայության գնդի վրա հարձակմանը:
«Այս վիճակը պիտի օր առաջ հանգուցալուծվի, իրենք զոհեր են: Հայի` հայի դեմ զենք վերցնելը ահավոր բան է, պետք է օր առաջա զենքը վայր դնել: Այս մարդիկ պետք է ունենան իրավունք արդարանալու, Սեֆիլյանն էլ պիտի ազատ արձակվի. թող գա, նստի, ասի` ինչ է եղել»,- ասաց նա: Դավիթ Գասպարյանի խոսքով` Ժիրայր Սեֆիլյանը կռվել է մեր ազգի համար, հաղթանակ տարել, ապահովել մեր առաջընթացը ու այդ այսօր հայտնվել բանտում, ինչն էլ դժգոհություն է առաջացրել հասարակության շրջանում:
«Հասարակության մեջ հարցեր են առաջանում: Ամուր պետություն են ուզում, արդարություն են ուզում, երբ դա չի լինում, ոտքի են կանգնում: Եթե տանը կռիվ է, մեղավորը մեծն է, ուրեմն մի բան այն չէ: Համո Սահյանը ասում էր` պետությունը իշխանություններինն է. երբ վատանում է վիճակը, անունը դնում են հայրենիք ու տալիս ժողովրդին: Մենք ուզում ենք, որ մեր երկիրը դառնա մեր բոլորինը»,- ասաց նա:
Բանաստեղծը կարծիք հայտնեց, որ մեր հասարկությունը ծայրահեղ լարվածության մեջ է, ինչի պատճառը սոցիալական անհավասարությունն է, դժգոհությունը:
Հիշեցնենք, որ հուլիսի 17-ի առավոտյան մի խումբ զինված անձինք Էրեբունիում գրոհով վերցրել են ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ՝ ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ոստիկանության ենթասպա Գագիկ Մկրտչյանը, օպերատոր Ռոբերտ Հայրապետյանը, նաեւ ՊՊԾ գնդի գրոհին մասնակցած անձանցից մեկը՝ Թաթուլ Թամրազյանը: վերջինիս վիճակը գնահատվում է ծանր, նա վերակենդանացման բաժանմունքում է: