58-ամյա Եղիշե Խաչատրյանի (հայտնի լեզվաբան Փառանձեմ Մեյթիխանյանի ամուսնու) սպանության վկաներից մեկը մինչեւ այժմ չի հարցաքննվել: Այս մասին NEWS.am-ի հետ զրույցում ասաց սպանության մեջ մեղադրվող Խաչիկ Կոսյանի պաշտպան Վաչագան Քոսյանը:
«Նա գլխավոր վկաներից է: Դեպքից հետո գնացել է ցուցմունք տալու, չեն վերցրել վկայություն: Այնինչ գլխավոր վկան էր նա ու նրա ցուցմունքով կարող էր հաստատվել կամ հերքվել Խաչիկ Կոսյանի մասնակցությունը»,- ասաց պաշտպանը:
Հիշեցնենք, որ սպանվածի մայրը, որը ականտես էր եղել միջադեպին, պատմել է, որ ինչ-որ աղջիկ է եղել որդուն ծեծի ենթարկածների հետ:
Հիշեցնենք, որ հունիսի 4-ին, ժամը 23-ին, «Ֆորդ Տրանզիտ» մակնիշի ավտոմեքենայի վարորդ, 1958 թ. ծնված Եղիշե Խաչատրյանի եւ ճանապարհատրանսպորտային երթեւեկության կանոնները խախտած ավտոմեքենայի վարորդի եւ ուղեւորների միջեւ Նուբարաշենի խճուղու թիվ 1/5 հասցեի մոտ տեղի էր ունեցել վիճաբանություն, որի ընթացքում ստացած մարմնական վնասվածքներից Եղիշե Խաչատրյանը մահացել էր:
Սպանության մեջ մեղադրվում են Արարատ Նիկողոսյանը, Արտաշես Չիչոյանը, Խաչիկ Կոսյանը եւ Յուրի Հ-ն:
