Օտար երկրները կարող են ներգրավվել Թուրքիայում հեղաշրջման փորձին: Այս մասին Al Jazeera հեռուստաընկերությանը տված հարցազրույցում նշել է Թուրքիայի նախագահ Ռեջեփ Թայիփ Էրդողանը:
Էրդողանի պնդմամբ, հնարավոր է՝ հեղաշրջման փորձը դեռ չի ավարտվել, եւ կարող են այլ պլաններ լինել: Նա հայտնել է, որ Թուրքիայում կալանավորումներն ու ձերբակալությունները շարունակվելու են, բայց ամեն բան լինելու է օրենքի սահմաններում:
Թուրքիայի նախագահի խոսքով, ԱՄՆ նախագահ Բարաք Օբաման խոսել է իր հետ հեռախոսով եւ աջակցություն հայտնել, բայց եթե Վաշինգթոնը հրաժարվի արտահանձնել շարժման գաղափարախոս Ֆեթուլլահ Գյուլենին, դա մեծ սխալ կլինի:
Միաժամանակ Էրդողանը բացառել է, որ Թուրքիան գլորվում է դեպի ավտորիտարիզմ՝ հերքելով ենթադրությունը, որ ժողովրդավարությունը երկրում սպառնալիքի տակ է. «Մենք մնում ենք ժողովրդավարական խորհրդարանական համակարգ եւ դրանից չենք նահանջի»:
Հարցին, թե ով է իրեն հայտնել հեղաշրջման փորձի մասին, Էրդողանը պատասխանել է, որ այդ մասին տեղեկացել է փեսան: Ընդ որում, սկզբում ինքը լուրջ չի ընդունել ասածը: