Ճապոնիայում վաճառքում հայտնվել է Pepper մարդանման տնային ռոբոտի համար հագուստ, հայտնում են տեղական լրատվամիջոցները:
Pepper ունիվերսալ տնային ռոբոտները առաջին անգամ շուկայում հայտնվել են 2015-ի հունիսին ու մեծ պահանջարկ ունեն՝ 1000 ռոբոտից բաղկացած յուրաքանչյուր նոր խմբաքանակ, որն ամեն ամիս հայտնվում է վաճառքում, վայրկենապես սպառվում է: Մեծ պահանջարկի պատճառով Pepper–ը կարելի է գնել միայն նախնական գրանցման միջոցով: Տարբեր հավելվածների օգնությամբ սմարթֆոնի հետ համատեղելիության շնորհիվ նա կարող է խաղալ երեխայի հետ, գտնել անհրաժեշտ տեղեկություն, խոսել տիրոջ հետ, հիշել ծրագրված գործի մասին: Մշակողների մտահղացումով Pepper–ը զուտ օգտակար խաղալիք չէ, տարբեր հավելվածների շնորհիվ այն կարող է դառնալ օտար լեզվի ուսուցիչ, անձնական մարզիչ ու դայակ երեխաների համար:
Առայսօր չէր հաջողվում ռոբոտների համար որեւէ հագուստ ստեղծել, քանի որ կտորը նվազեցնում էր ջերմափոխանակությունը, իսկ դա էլ իր հերթին հանգեցնում էր մեխանիզմի գերտաքացմանը: Իսկ հիմա հատուկ Pepper–ի համար մշակվել է հատուկ կտոր, որից ստեղծվել են հինգ տեսակի համազգեստներ՝ բուժքրոջ, տեխնիկական աշխատողի եւ այլն: Հագուստի գինը տատանվում է 1-2 հազար դոլարի միջեւ: Առաջին փուլում գնորդները այն ընկերություններն ու ֆիրմաները կլինեն, որոնք օգտագործում են Pepper–ը: Նրանք կարող են հագուստի վրա ոչ միայն իրենց լոգոտիպը փակցնել, այլեւ այն հնարավորինս նմանեցնել իրենց ֆիրմայի համազգեստին: