Թուրքիայում սահմանված արտակարգ դրության ռեժիմը երկարաձգելու որեւէ խոչընդոտ չկա: Այս մասին Reuters-ին տված հարցազրույցում հայտարարել է Թուրքիայի նախագահ Ռեջեփ Թայիփ Էրդողանը:
Նրա խոսքով՝ հեղաշրջման փորձի հետեւանքով 246 մարդ է զոհվել՝ չհաշված հեղաշրջման մասնակիցներին, ավելի քան 4 հազար մարդ ձերբակալվել է, այդ թվում՝ 103 գեներալ: Էրդողանը խոստովանել է, որ երկրի հետախուզությունը զգալի բացթողումներ է թույլ տվել:
«Ակնհայտ է, որ մեր հետախուզությունը խնդիրներ ունի, հերքելն իմաստ չունի»,- ասել է Էրդողանը: Նա, միաժամանակ, չի բացառել հեղաշրջման փորձի կրկնությունը, բայց նշել է, որ դա դյուրին չի լինի, քանի որ «ավելի զգոն ենք դարձել»:
Էրդողանը հայտարարել է, որ Ֆեթուլլահ Գյուլենի շարժման հանդեպ նույնպիսի հարաբերություններ կլինի, ինչպես «ահաբեկչական մեկ այլ կազմակերպության» հանդեպ՝ զուգահեռ անցկացնելով Քրդական աշխատավորական կուսակցության հետ: «Մենք կշարունակենք պայքարը: Այդ մարդիկ թափանցել են պետական կազմակերպություններ եւ ըմբոստացել երկրի դեմ»,- ասել է նա:
Հիշեցնենք, որ Թուրքիայում պետական հեղաշրջման փորձի հետ կապված՝ երկրում 3 ամիս ժամկետով արտակարգ դրության ռեժիմ է սահմանվել: