Ամերիկյան Wells Fargo բանկային ընկերության նախկին մենեջեր Ալբերտ Յագուբյանին կալանավորել են 1.29 մլն դոլարի չափով գումար լվանալուն աջակցելու համար:
Իշխանությունները հավաստիացնում են, որ նա երկու տարվա ընթացքում օգնել է Գլենդեյլի երկու բնակիչների՝ Արտաշես Դարբինյանին ու Օրբել Հակոբյանին ապօրինի ճանապարհով ստացված գումարները օրինականացնել բանկի միջոցով՝ դրա դիմաց ստանալով իր մասնաբաժինը, հայտնում է Los Angeles Times–ը:
36-ամյա Յակուբյանը չի ընդունել իր մեղավորությունը: Քննությունը վստահեցնում է, որ նա օգնել է կեղծ բանկային հաշիվներ բացել խաբեությամբ ստացված գումարները լվանալու նպատակով: 385 դոլար պարգեւատրումով հանցագործները առեւտրային ապրանքանիշների տերերին առաջարկում էին հետեւել հեղինակային իրավունքների պահպանմանը ու կանոնավոր հաշվետվություններ ուղարկել: Սակայն այդ ծառայությունները իրականում չեն կատարվել, իսկ առեւտրային ապրանքանիշների տերերի ուղարկված միջոցները փոխանցվում էին կեղծ հաշիվների: Խաբեբաները որոշ գումարներ են օգտագործել ոսկի գնելու համար:
Ավելի վաղ Դարբինյանն ու Հակոբյանը դատված են եղել խաբեության համար: Այս գործով դատավարությունը կսկսվի սեպտեմբերին: