Նիսի Անգլիական լողափին հուլիսի 14-ին ՝ ահաբեկչության պահին ձեռնարկված անվտանգության միջոցառումները հետաքննվելու են Ֆրանսիայի ՆԳՆ կողմից:Նման որոշում է կայացրել գերատեսչության ղեկավար Բերնար Կազնեւը՝ Բաստիլի գրավման օրը հրավառության ժամանակ հավաքված շուրջ 30 000 մարդու անվտանգության ապահովման թերացումների շուրջ ծավալված բանավեճի ֆոնին: Հետաքննությունը անցկացնելու է ՆԳՆ անվտանգության ծառայությունը, արդյունքները պարզ կդառնան հաջորդ շաբաթ, հայտնել է Ֆրանսիայի նախագահ Ֆրանսուա Օլանդը, փոխանցել է RFI-ն:
Անմիջապես ահաբեկչությունից հետո, որի ժամանակ 84 մարդ է զոհվել, տեղի իշխանությունները քննադատել են ՆԳՆ-ին՝ հուլիսի 14-ին Նիսում տոնակատարությունների ժամանակ անվտանգության անբավարար միջոցառումների համար: Libération թերթը իր համարում նյութ է տպագրել, որում վստահեցնում էր, որ Անգլիական լողափի հետիոտնային գոտի մուտքը երեկոյան ժամը 20:30-ից սկսած պահպանվում էր մունիցիպալ ոստիկանության միայն մեկ մեքենայով: Ազգային ոստիկանության աշխատակիցներն ու նրանց մեքենաները այնտեղ չկային: Թերթը հանգել է այն եզրակացության, որ ոստիկանությունը բավարար միջոցներ չի ունեցել 19 տոննայանոց բեռնատարով առաջացող ահաբեկչի ճանապարհը փակելու համար:
Ֆրանսիայի ՆԳՆ-ն անցած գիշեր հրապարակել է հայտարարություն, որում հերքել է Libération –ի պնդումները: Նախարարությունը բացատրել է, որ Անգլիական լողափի տոնակատարությունների անցկացման վայր մուտքը պահպանվում էր ազգային ոստիկանության երկու մեքենաներով ու վեց աաշխատակիցներով: Ահաբեկիչը մեծ արագությամբ է շրջանցել այդ մասը: Երեք աշխատակիցներ սկսել են հեռապնդել բեռնատարին ու չեզոքացրել են ահաբեկչին 2 րոպեից էլ քիչ ժամանակում:
Այս բանավեճին վերջ տալու համար ՆԳՆ ղեկավար Բերնար Կազնեւը ծառայողական հետաքննություն է նշանակել: Նիսում անվտանգության միջոցառումները կգնահատի հենց անվտանգության ծառայությունը:
