ԼՂՀ ՊԲ հարավարեւելյան ուղղությամբ տեղակայված զորամասերից մեկի կրակային դիրքում մայիսի 29-ին հանկարծամահ եղած 19-ամյա Սուրեն Մոսիյանի մայրը սպառնում է նստացույց սկսել, եթե կարճ ժամանակում չպատժվեն իր որդուն հիվանդ վիճակում բանակ զորակոչածները:
«Իմ երեխան 6 անգամ պառկել է հոսպիտալում, ոչ ոք ուշադրություն չի դարձրել: Քննիչը չգիտի՝ ինչ ասի ինձ: Ես պահանջում եմ, որ մեղավորները պաժվեն, ով որ երեխուս սպանել է»,- NEWS.am-ի հետ զրույցում ասաց զինծառայողի մայրը՝ Անժելա Մոսիյանը:
Տիկին Անժելան նշեց, որ պատրաստվում է նախ դիմել ՀՀ Պնախարարին:
Հիշեցնենք, որ զինծառայողի մորն ասել են, որ նրա երիկամների ազոտն է բարձրացել, սրտի ինֆարկտ է ստացել ու մահացել: Մայրը պնդում է նաեւ, որ որդին ողնաշարի ճողվածք է ունեցել եւ ծառայության ընթացքում 4 անգամ հոսպիտալացվել է:
1997թ. ծնված Սուրեն Մոսիյանը հանկարծամահ էր եղել մայիսի 29-ին` ժամը 22:00-ի սահմանում, ՊԲ հարավարեւելյան ուղղությամբ տեղակայված զորամասերից մեկի կրակային դիրքում: Զինծառայողը Բաքվից գաղթած փախստականի ընտանիքից էր, մոր, եղբոր ու քրոջ հետ բնակվում էր Արարատի մարզի Արտաշատ քաղաքում՝ սոցիալապես ծանր պայմաններում։ Նա ընտանիքի կրտսեր երեխան էր։
Զինծառայողի մահվան հանգամանքները պարզելու համար կատարվում է քննություն: