Լեհական UOKiK հակամենաշնորհային կարգավորիչը հրաժարվել է ստեղծել համատեղ ձեռնարկություն «Հյուսիսային հոսք 2»–ի շինարարության համար, հայտնում է Reuters-ը:

Լեհական կարգավորիչը դեմ է նախագծին՝ հաշվի առնելով, որ դա կարող է հանգեցնել շուկայում բնական գազի մրցակցության սահմանափակմանը, սակայն միաժամանակ նշում է, որ վերոնշյալ առարկությունները դեռևս վերջնական որոշում չեն հանդիսանում: «Ներկայումս «Գազպրոմ»-ը գերակշռող դիրք է զբաղեցնում Լեհաստանին գազ մատակարարելու  առումով, և նախատեսվող գործարքը կարող է էլ ավելի ամրապնդել ընկերության բանակցային դիրքը Լեհաստանում սպառողների նկատմամբ»,– ասվում է UOKiK-ի հաղորդագրությունում:

Նախորդ տարվա ապրիլին Եվրահանձնաժողովը «Գազպրոմին» կասկածում էր Եվրոպայի որոշ երկրներում հակամենաշնորհային օրենսդրության խախտման մեջ: «Գազպրոմը» հերքել էր մեղադրանքը: Ավելի վաղ, այս տարի Գերմանիան հաստատել էր «Հյուսիսային հոսք 2»–ի շինարարությունը՝ արդեն իսկ գոյություն ունեցող «Հյուսիսային հոսքի» նախագծի ընդլայնումը, որը հիմնական խողովակաշար է Բալթիկ ծովով դեպի Եվրոպա։