Երեւանի Շենգավիթ վարչական շրջանի ընդհանուր իրավասության դատարանում այսօր` հուլիսի 22-ին ցուցմունք տվեց մեկ տարի առաջ մահացած ծննդկան Մերի Մարգարյանի ամուսին Արթուր Հարությունյանը:
«Կինս 2015թ. փետրվարի տասնմեկից հաշվառվել է «Շենգավիթ» բժշկական կենտրոնում` Շուշանիկ Բախշյանի մոտ: Հուլիսի քսանին վերջին անգամ գնացել ենք բժշկուհու մոտ: Առանց հետազոտության անելու` Շուշանիկ Բախշյանն ասաց, որ ամեն ինչ լավ է, գնանք տուն եւ մեկ շաբաթից գանք էխո անելու: Երեք օր անց Մերին զանգեց, ասաց, որ ջերմություն ունի, զանգել է Շուշանիկ Բախշյանին, որն էլ խորհուրդ է տվել պարացետամոլ խմել»,- պատմեց Արթուր Հարությունյանը:
Հուլիսի 24-ին ըստ ամուսնու` Մերին զանգել է բժշկուհուն, հայտնել, որ 39,6 ջերմություն է ունեցել. «Բժշկուհին ասաց` անալգին դիմեդրոլ սրսկվի ու արի հիվանդանոց: Գնացինք հիվանդանոց, որտեղ Շուշանիկ Բախշյանն ուղարկեց կոկորդը եւ ատամները ստուգելու: Երկու դեպքում էլ խնդիր չկար եւ բժշկուհին ասաց, որ գնանք տուն եւ եթե ջերմություն ունենա, պարացետամոլ խմի»:
Մերի Մարգարյանի ամուսնու ցուցմունքի համաձայն` հաջորդ երկու օրերին էլ կնոջ ջերմությունը չի իջել, միայն պարացետամոլն ընդունելուց հետո որոշակի ժամանակ իջել է մինչեւ 37,8:
«Ամսի 26-ին Մերին շատ վատ էր, կնոջս մայրը զանգեց Շուշանիկ Բախշյանին, որն էլ ասաց, թե տարեք հիվանդանոց, ես կզգուշացնեմ այնտեղ: Գնացինք հիվանդանոց, ժամը 16:30-ի սահմաններում տեսել եմ հերթապահ բժշկին` Տիգրան Սարգսյանին, խնդրեցի թոքերն ռենտգեն անել, բայց չարեց` պատճառաբանելով, որ չի կարելի հղիության այս փուլում: Հետո չեմ տեսել էլ նրան»,- ասաց նա:
Արթուր Հարությունյանի պատմելով` հաջորդ օրը կնոջ ինքնազգացողությունը կտրուկ վատացել է եւ որոշում է կայացվել տեղափոխել բազմապրոֆիլային հիվանդանոց. «Այստեղ ինձ ասացին, որ շտապ պետք է կեսարյան հատում անել, վայրկյանները կարեւոր են... հետո երկու օր անց Մերին մահացավ»:
Հիշեցնենք, որ այս գործով երկու մեղադրյալ կա` Շուշանիկ Բախշյան եւ Անի Բաբելյան:
