Էրդողանը Թուրքիան մի հսկայական գուլագի է վերածում: Այս մասին The Huffington Post –ում հրապարակված հոդվածում նշել է հեղինակ Դեյվիդ Ֆիլիպսը:
Հոդվածում, մասնավորապես, նշվում է.
Անցյալ շաբաթվա ձախողված հեղաշրջման փորձից հետո Էրդողանը սպառնացել է. «Վերջին գործողությունը դավաճանական գործողություն է, եւ նրանք ստիպված կլինեն թանկ վճարել դրա համար»:
«Այս քայլը մի մեծ պարգեւ է Աստծո կողմից: Ինչո՞ւ: Որովհետեւ դա մեզ հնարավորություն կտա զտել զինված ուժերը, որոնք ամբողջությամբ մաքրվելու կարիք ունեն»:
Էրդողանը Թուրքիան մի հսկայական գուլագի է վերածում:
Վերջին 5 օրվա ընթացքում, 50 000 ռազմական պաշտոնյաներ, ոստիկաններ, դատավորներ, լրագրողներ, մարզպետներ ու քաղծառայողներ են կալանավորվել, նրանց գործունեությունը կասեցվել է կամ հեռացվել են աշխատանքից:
Մարդկանց ձերբակալում եւ բանտարկում են առանց օրինական հիմքերի: Նրանց գտնվելու վայրն անհայտ է:
Բոլոր բուհերի դեկաններին՝ ավելի քան 1500 հոգու, ստիպել են հրաժարական տալ: 15 000 մանկավարժների գործունեություն կասեցվել է:
Մարդկանց արգելում են լքել երկիրը: Ոչ ոք չի կարող ծառայողական անձնագրով ճանապարհորդել: Պետական հիմնարկների աշխատակիցները պետք է հատուկ թույլտվություն ունենան:
Առաջադիմականները եւ «ընդդիմադիրները» վտանգված են: Նրանց կենսագրական նկատմամբ ստուգումներ են տարվում՝ հետաքննելու վերջիններիս կապերը Ֆեթուլլահ Գյուլենի՝ Փենսիլվանիայում բնակվող քարոզչի հետ, ում Էրդողանը հեղաշրջումը ծրագրելու մեջ է մեղադրել:
Վերջը չի երեւում: Էրդողանը եռամսյա արտակարգ դրություն է հայտարարել:
Օբամայի վարչակազմն արդարացիորեն դատապարտել է հեղաշրջումը: Զինվորականների կողմից իշխանության գրավումը ժողովրդավարություն տանող ուղի չէ: Ներկայումս ԱՄՆ պաշտոնյաները դեմ են արտահայտվում Թուրքիայում տեղի ունեցող զտումներին, սակայն նրանք քիչ լծակներ ունեն:
Պետքարտուղար Ջոն Քերրին զգուշացրել է, «Կամայական զտումներ եւ օրենքի գերակայության ու արդարադատության համակարգից դուրս քրեական պատժամիջոցներ չպետք է լինեն»: Քերրին նաեւ ասել է, որ ՆԱՏՕ-ն պետք է «գնահատական տա» Թուրքիայի գործողություններին: «ՆԱՏՕ-ն նաեւ ժողովրդավարության հետ կապված պահանջ ունի»: Նա բարձրացրել է Թուրքիայի ՆԱՏՕ-ին անդամակցության վերանայման հնարավորությունը:
Երբ Էրդողանն առաջարկեց, որ Թուրքիան կարող է վերականգնել մահապատիժը, որ վերացվել էր 2004 թ., Եվրամիության արտաքին քաղաքականության բարձր ներկայացուցիչ Ֆեդերիկա Մոգերինին զգուշացրել է. «Չի կարող գործընկեր պետություն դառնալ մի երկիր, որտեղ մահապատիժ է կիրառվում»: Նա հավելեց. «Կոչ ենք անում լիարժեք պահպանել Թուրքիայի սահմանադրական կարգը եւ ... կարեւորում ենք օրենքի գերակայությունը: Անհրաժեշտ է, որպեսզի Թուրքիան հարգի ժողովրդավարությունը, մարդու իրավունքներն ու հիմնարար ազատությունները»:
Մոգերինիի նախազգուշացումն ակնհայտորեն անտեսվեց: Հեղաշրջման կազմակերպիչներին խոշտանգում են եւ ցուցադրում հեռուստատեսությամբ: Էրդողանը սպառնացել է կախել հեղաշրջմանը ներգրավված անձանց: Մի երիտասարդ զինվոր գլխատվեց եւ նրա մահապատիժը հեռարձակվեց սոցիալական լրատվամիջոցներով: Տեղեկություններ չկան, թե քանիսն են արդեն խոշտանգվել կամ սպանվել:
Իրականությունը հետեւյալն է. Էրդողանին քիչ է հուզում, թե ինչ է ասվում:
Կոռումպացված Էրդողանին մերկացնելը նրա վարքագծի վրա ազդելու միակ ճանապարհն է:
Թուրք-իրանական երկքաղաքացիություն ունեցող Ռեզա Զարաբը, ով սերտ կապեր ուներ Էրդողանի հետ, մայիսին ձերբակալվել էր Մայամիի միջազգային օդանավակայանում: Այս գործով ԱՄՆ մեղադրող կողմ հանդիսացող դատախազ Փրիթ Բհարարան խոստացել է բացահայտել Զարաբի փողերի լվացման եւ ոսկու վաճառքի փաստը, ով փորձում էր խուսափել Իրանի նկատմամբ պատժամիջոցներից:
Զարաբը կարող է վկայություն տալ Էրդողանի, նրա որդու՝ Բիլալի եւ Էրդողանի մոտ շրջապատի դեմ: ԱՄՆ փաստաբանը պետք է շուտափույթ հրապարակի Զարաբի նկատմամբ մեղադրական եզրակացությունը՝ նրա խարդախ բիզնեսի շահառուների անունները տալով:
Երբ մեղադրական եզրակացությունը հրապարակվի, ԱՄՆ-ն պետք է պատժամիջոցներ կիրառի մեղադրական եզրակացությունում ներգրավված բոլոր անձանց նկատմամբ: Պետք է սառեցնի նրանց արտասահմանյան ակտիվները, արգելի նրանց ճանապարհորդել, ինչպես նաեւ իրենց ընտանիքի անդամներին արգելի ճանապարհորդել:
Պատմությունը մեզ ցույց է տալիս, որ բռնապետներն անտեսում են ոչինչ չպարտադրող նախազգուշացումները: Հիտլերը եւ Մուսոլինին ժողովրդավարական ճանապարհով էին ընտրվել, ինչպես Էրդողանը: Նրանք անտեսեցին միջազգային ճնշումը:
Չարաշահման քրեորեն դատապարտումը եւ խելամիտ թիրախային պատժամիջոցները միակ հասանելի գործիքներն են Էրդողանի զտիչ բռնությունների զսպման համար: