«Հիմնադիր խորհրդարանի» անդամ Կարո Եղնուկյանին մեղադրանք է առաջադրվել քրեական օրենսգրքի 38-218 եւ 38-219 հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար:
Կարո Եղնուկյանի փաստաբան Տիգրան Հայրապետյանի խոսքով, այս հոդվածներով նախատեսվում է 8-15 տարվա ազատազրկում։
Փաստաբանի խոսքով, այսօր Քննչական կոմիտեն միջնորդություն է ներկայացնելու դատարան՝ խափանման միջոց ընտրելու համար։
«Կարո Եղնուկյանին առաջադրված հոդվածներից բխում է, որ «Սասնա ծռեր» զինված խմբի արածն ահաբեկչություն չէ, որովհետեւ եթե ահաբեկչություն լիներ, Եղնուկյանին պետք է մեղադրեին ահաբեկչությանն օժանդակելու մեջ, մինչդեռ նրան մեղադրում են «պատանդներ պահելուն օժանդակելու» մեջ»,-ասաց փաստաբանը:
Հայրապետյանի խոսքով, Կարո Եղնուկյանը ծանր շնչառական խնդիրներ ունի եւ քնում է միայն հատուկ սարքով: Նա խնդրեց, որ եթե կալանավորելու են, ապա թող առանձին խցում տեղավորեն, որովհետեւ այդ սարքը գիշերը ձայն է արձակում եւ կարող է խանգարել խցակիցներին:
Նշենք, որ Կարո Եղնուկյանը ձերբակալվել է հուլիսի 19-ին: Ազգային անվտանգության ծառայությունը խուզարկություն էր իրականացրել Կարո Եղնուկյանի եւ նրա կնոջ մոր բնակարաններում, երկու մեքենաներում, ավտոտնակում, որից հետո Եղնուկյանը բերման էր ենթարկվել եւ ձերբակալվել։
Կարո Եղնուկյանը 1988-ից ԱԻՄ-ի անդամ է, ակտիվ գործունեություն է ծավալել ղարաբաղյան պատերազմի ժամանակ, մեծ ֆինանսավորումներ է իրականացրել: Լինելով ԱՄՆ քաղաքացի, վերջին 10 տարում ընտանիքով վերադարձել ու ապրում է Հայաստանում: