Ոստիկանության պարեկապահակային գնդի գրավումից 6 օր անց Սերժ Սարգսյանը երկրորդ խորհրդակցությունն է հրավիրել, որի ժամանակ առաջին անգամ հանդես է եկել հայտարարությամբ: Երկրի նախագահն ընդգծել է՝ ստեղծված իրավիճակին պետք է տրվի խաղաղ հանգուցալուծում, ապա կոչով դիմել է «Սասնա ծռեր» խմբին:

Սերժ Սարգսյանը հանձնարարել է իրավապահ մարմինների ղեկավարներին իրենց գործունեությունը շարունակել իրականացնել խստագույն զսպվածությամբ եւ օրենքի շրջանակներում: Ստեղծված իրավիճակը, ըստ Հանրապետության նախագահի, արդեն ավելի երկար է տեւում, քան կարող են իրենց թույլ տալ:

Սերժ Սարգսյանի հայտարարությունից մոտ 1 ժամ անց եղավ նաեւ առաջին նախագահի գնահատականը:

«Արտաքին մարտահրավերի դիմակայման հրամայականի թելադրանքով ներքին խնդիրները մի կողմ դնելու եւ համախմբվելու՝ հասուն պետություններին, ազգերին ու հասարակություններին հատուկ վերը հիշատակված ոսկե կանոնը մեզ մոտ առայժմ չի գործում, ինչը կարող է մեզ հասցնել ազգային աղետի»,- ասել է Լեւոն Տեր- Պետրոսյանը: ՀԱԿ առաջնորդը վստահ է, որ ճգնաժամային պահերին Ժիրայր Սեֆիլյանն ունակ է սառը դատել ու ողջամիտ որոշումներ կայացնել եւ այս անգամ էլ որոշում կկայացնի՝ Հայաստանի ու Արցախի ճակատագիրը վեր դասելով ամեն ինչից: Թե ինչու է այս իրավիճակն առաջացել, Լեւոն Տեր- Պետրոսյանը նշեց, որ անիմաստ է այժմ վերլուծել պատճառները:

Ավելի ուշ եղան նաեւ քաղաքական մյուս ուժերի հայտարարությունները երկրում ստեղծված իրավիճակի մասին:

Գիշերը Խորենացի փողոցում հանգիստ է անցել: Մի քանի հարյուր ակտիվիստներ նախորդ օրերի պես ժամը 18:30-ից հավաքվել էին այնտեղ՝ փորձելով լուծել զինված խմբի անդամների սննդի հարցը: Շուրջ 4 ժամ անց ցուցարարները տեղեկություններ ստացան, որ սննդի հարցը լուծվել է գեներալ Վիտալի Բալասանյանի միջնորդությամբ: Հիշեցնենք, որ երեկ առավոտյան արցախցի պատգամավորն այցելել էր ոստիկանության ՊՊԾ գունդ, զրուցել զինված խմբի հետ: Մամուլը գրում է, որ դրանից հետո Բալասանյանը հանդիպել է նաեւ Սերժ Սարգսյանի հետ:

Գրավված գնդի տարածքում երեկ նաեւ քաղաքական- հասարակական գործիչներ, մտավորականներ էին հավաքվել, որոնք կոչ էին անում հարցը լուծել բացառապես խաղաղ ճանապարհով: Հուլիսի 20-ին ոստիկանների եւ ցուցարարների միջեւ տեղի ունեցած բախումներից հետո Նիկոլ Փաշինյանը Խորենացի փողոցում չէր:  Լրագրողների հետ հանդիպմանն ընդդիմադիր պատգամավորը հայտարարեց, որ կարծիքներ են հնչում, որ իրեն ասել են՝ այնտեղ չպետք է հրահանգներ տա:

Հայաստանի եւ Ադրբեջանի նախագահների ռուսաստանյան հանդիպումից հետո առաջին անգամ ադրբեջանական կողմը կրակ է բացել Տավուշի մարզի Մովսես գյուղի ուղղությամբ: Հակառակորդը կրակել է գյուղի կենտրոնում գտնվող դպրոցի ստադիոնի վրա, որտեղ այդ պահին երեխաներ են եղել: Բարեբախտաբար, տուժածներ չկան:

Դատարանում այսօր ցուցմունք է տվել անցած տարվա հուլիսին մահացած Մերի Մարգարյանի ամուսինը: Արթուր Հարությունյանը կնոջ մահվանից հետո առաջին անգամ էր պատմում դեպքի մանրամասները: Ըստ նրա ցուցմունքի՝ Մերին 4 օր շարունակ բարձր ջերմություն է ունեցել, իսկ ամբաստանյալ Շուշանիկ Բախշյանը հրաժարվել է հոսպիտալացնել:

Դատավարության մասնակիցների մոտ հարցեր առաջացան՝ դեղագետ Մերի Մարգարյանը չէր պատկերացնո՞ւմ իրավիճակի լրջությունը: Եվ Մերիի ամուսինը, եւ հայրը պնդեցին, որ նա անվերապահորեն վստահել է «Շենգավիթ» բժշկական կենտրոնի բժշկուհուն: 

Շուշանիկ Բախշյանը որեւէ հարց չտվեց, լուռ լսում էր:

Լվովում անցկացված Եվրոպայի առաջնությունում արցախցի Դավիթ Պետրոսյանի եւ ադրբեջանցի մարզիկի մենամարտից հետո Հայաստանի ներկայացուցիչների վրա հարձակվելու համար որակազրկված Ադրբեջանի հավաքականն այս օրերին մասնակցում է Մոսկվայում ընթացող աշխարհի 5-րդ առաջնությունը: Ինչու է Ռուսաստանը ամեն դեպքում որոշել թույլ տալ որակազրկված Ադրբեջանին՝ մասնակցելու առաջնությանը: Ֆեդերացիայի նախագահը պնդում է՝ ադրբեջանցիները ներողություն են խնդրել Հայաստանի հավաքականից եւ ռուսական կողմը որոշել է շանս տալ:

Դոլարն ու եվրոն թանկացել են, իսկ ռուբլին ու ֆունտը՝ էժանացել: Դոլարի փոխարժեքը կազմել է 476, ռուբլունը՝ 7.39, եվրոն՝524, ֆունտինը՝ 624 դրամ: 

Հուլիսի 23-ին օդի ջերմաստիճանը աստիճանաբար կնվազի 3-4 աստիճանով: Երեւանում երեկոյան ժամերին հնարավոր է  կարճատեւ անձրեւ: Առաջիկա գիշերը մայրաքաղաքում կդիտվի +19+21, իսկ վաղը ցերեկը՝ +36+37 աստիճան տաքություն։