ՊՊԾ գնդում գտնվողների սննդի, դեղորայքի հետ կապված խնդիրները կարգավորվում են։ Այդ մասին NEWS.am-ի թղթակցի հետ զրույցում ասել է Արցախի հերոս, գեներալ Վիտալի Բալասանյանը։
Նա հավաստիացրել է, որ ինքն անձամբ անմիջականորեն հետեւում է ոստիկանության ՊՊԾ գնդի տարածքում գտնվողների սննդի, դեղորայքի, բժշկական օգնության ու մյուս հարցերին, եւ հավաստիացնում է, որ դրանք կարգավորվում են:
«Ես անձամբ հավաստիացնում եմ, որ սննդի, դեղորայքի, բժկական օգնության հետ կապված հարցերը, այդ տիպի մյուս հարցերը կարգավորվում են: Ես անձամբ եմ այնտեղ ուղեկցել բժշկական խմբին, որը տեղում է, տեղում աշխատում է. երեկ և այսօր կատարվել է անհրաժեշտ բժշկական ողջ օժանդակությունը: Իսկ ավելի երկար ու ավելի մանրամասն ամեն ինչի մասին կխոսեմ առաջիկայում»,- ասել է Վիտալի Բալասանյանը:
Հիշեցնենք, որ հուլիսի 17-ի առավոտյան մի խումբ զինված անձինք Էրեբունիում գրոհով վերցրել են ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ եւ ՊՊԾ գնդի գրոհին մասնակցած անձանցից մեկը: Մինչ այժմ իրականացվող գործողության շրջանակներում ազատվել է հինգ անձ: Այս պահին պատանդների թիվը 4 է:
