Թուրքիան պետք է ԱՄՆ-ին ապացույցներ ներկայացնի, որոնք կհաստատեն իսլամական քարոզիչ Ֆեթուլլահ Գյուլենին արտահանձնելու անհրաժեշտությունը: Այս մասին հայտարարել է ԱՄՆ նախագահ Բարաք Օբաման:
«Թուրքիայի նախագահն ու կառավարությունը վստահ են, որ պարոն Գյուլենը, որն օրինական հիմունքներով Փենսիլվանիա նահանգում է բնակվում, ինչ-որ կերպ կապված է պետական հեղաշրջման փորձին: Ես նախագահ Էրդողանին ասել եմ, որ իրենք պետք է մեզ ապացույցներ ներկայացնեն պարոն Գյուլենի կամ ԱՄՆ-ի տարածքում գտնվող ցանկացած այլ անձի մասին»,- Սպիտակ տանը Մեքսիկայի նախագահի հետ համատեղ մամուլի ասուլիսում հայտարարել է Օբաման:
Նա ընդգծել է, որ արտահանձնման մասին որոշումն անձամբ ինքը չի կայացնում, դա վերաբերում է արդարադատության նախարարությանն ու դատարաններին: