Երեւանի Խորենացի փողոցում անցած մի քանի օրերի ընթացքում տեղի ունեցած բռնությունները գրանցվում են մարդու իրավունքների պաշտպանության կազմակերպությունների կողմից։
Human Rights Watch կազմակերպության Եվրոպայի եւ Միջինասիական երկրների բաժնի փոխտնօրեն Ջեյն Բյուքանանը «Ամերիկայի Ձայն»-ի հայկական ծառայությանն ասել է, իրենք առաջին օրերից իսկ հետեւել են իրադարձություններին, համոզված լինելու համար, որ չեն ոտնահարվում մարդու իրավունքները եւ որ ապահովվում են ցուցարարների ձայնը լսելի դարձնելու համար պայմաններ։
Անդրադառնալով ցուցարարների այն բողոքներին, որոնց համաձայն ոստիկանությունը դիմել է «բիրտ ուժի եւ նսեմացրել իրենց», Բյուքանանն ասել է. «Մենք ունենք մտահոգություններ այդ կապակցությամբ եւ գտնում ենք, որ ոստիկանների վարքագծի ու տեղի ունեցած դեպքերի առնչությամբ պետք է սկսվի հետաքննություն։ Ճիշտ է, եղել են նաեւ ցուցարարների կողմից բռնություններ, որոնց ոստիկանությունն ունի պատասխան տալու իրավասություն, սակայն դա պետք է արվեր միայն համաչափ ուժի կիրառմամբ»։
Հարցին, թե ի՞նչն է մարդկանց դուրս բերում փողոց, նա պատասխանել է. «Դուրս են գալիս՝ իրենց ձայնը լսելի դարձնելու համար։ Եվ սա կառավարության համար մի լավ հնարավորություն է՝ լսելու մարդկանց մտահոգությունները։ Մարդիկ ուզում են, որ իրենց իրավունքները պաշտպանվեն։ Խոսքը կարող է վերաբերել ընտրություններին, այլ մեխանիզմների, կամ դատական համակարգի անկախությանը։ Հստակ է ժողովրդի շրջանում դժգոհության առկայությունը»։
Նա նշել է, թե կազմակերպությունը մանրազնին է ուսումնասիրելու երեւանյան դեպքերը, որից հետո որոշելու է, թե ինչպիսին է լինելու արձագանքն իրենց կողմից, եւ այս օրերի իրադարձությունները տեղ են գտնելու Հայաստանի մասին կազմակերպության հաջորդ զեկույցում։