Ապրիլյան պատերազմում վիրավորված Ռոլանդ Սահակյանի եւ Ավետիս Զարգարյանի բուժումը Կենտրոնական կլինիկական զինվորական հոսպիտալում ավարտվել է:
NEWS.am-ի տեղեկություններով՝ հոսպիտալի բժիշկներն իրենց աշխատանքն ավարտել են, զինծառայողների հետագա բուժումը պետք է կազմակերպել վերականգնողական կենտրոններում: Այս պահին արդեն քննարկվում է նրանց արտասահման տեղափոխելու հարցը: Չի բացառվում, որ Ավետիսն ու Ռոլանդն առաջիկայում վերջապես կմեկնեն արտերկիր՝ բուժումը շարունակելու նպատակով:
Հիշեցնենք, որ իրավասու մարմիններն ավելի քան մեկ ամիս է՝ հարցումներ են ուղարկում արտասահմանյան կլինիկաներ: Բանակցություններից հետո ՊՆ համապատասխան վարչությունը պետք է տեղեկությունների ամբողջական փաթեթն ուղարկի Առողջապահության նախարարության ստեղծած հատուկ հանձնաժողով, որը որոշում է կայացնում վիրավոր զինվորների բուժումն արտասահմանում կազմակերպելու մասին Հայաստանում այն կազմակերպելու անհնարինության պատճառով: Սակայն մինչ օրս այդ որոշումը չի կիրառվել որեւէ զինվորի նկատմամբ: Գերմանիայում գտնվող Արամ Լազգիյանը եւ Ռուբեն Առաքելյանը այժմ Գերմանիայում բուժում են ստանում, բայց դրա գումարը հավաքվել է մասնավոր նվիրատվությունների միջոցով:
Հիշեցնենք, որ Ավետիս Զարգարյանն ու Ռոլանդ Սահակյանը վիրավորվել են ապրիլի 4-ին ադրբեջանական ագրեսիայի հետեւանքով:
Հոսպիտալում է գտնվում նաեւ մայիսի 13-ին ծանր վիրավորված Հովհաննես Պողոսյանը: Նա գլխի շրջանում վիրավորում էր ստացել, բժիշկների երկարատեւ պայքարից հետո այսօր Հովհաննեսը սկսել է խոսել եւ կամաց- կամաց քայլել: Ամենայն հավանականությամբ, նա առաջիկայում կտեղափոխվի Կարմիր խաչի վերականգնողական կենտրոն: