«Սասնա ծռեր» խմբի անդամները ամենակարեւորը հարցը դրել են Ժիրայր Սեֆիլյանի խափանման միջոցի քննարկումը, որն այս պահի դրությամբ ներկայացված է իշխանություններին եւ գտնվում է օրակարգային ամենակարեւոր հարցերում: Այս մասին նախօրեին «Շանթ» հեռուստաընկերությանը տված հարցազրույցում նշել է Արցախի հերոս, ԼՂՀ ԱԺ պատգամավոր Վիտալի Բալասանյանը, ով պատմել է «Սասնա ծռեր» խմբի կողմից գրավված ՊՊԾ գունդ իր այցելության մասին:
Նրա խոսքով, պահանջ է ներկայացվել նաեւ մյուս տղաներին ազատ արձակելու վերաբերյալ:
Բալասանյանը նշել է, որ ներկայումս ամեն ինչ հանգիստ է եւ՛ ուժային կառույցների կողմից, եւ՛ զինված խմբի տղաների կողմից, երեկ նույնպես հանգիստ է եղել, իսկ նախանցած օրվա երեկոյան, երբ որ եղավ ընդհարում, ըստ նրա, սադրանքների արդյունքում եղան այդքան վիրավորներ:
«Տղաները համոզվել են, որ պրովոկացիաները հրահրում են ոչ թե իրավապահ մարմինները, այլ միտինգից»,-ասել է նա եւ նշել, որ կա օրենք, որը պետք է պարտադրել եւ՛ իշխանություններին, եւ՛ իրավապահ մարմիններին, եւ՛ ուժային կառույցներին, եւ՛ զինված խմբերին, եւ՛ քաղաքական կուսակցության առաջնորդներին, որ պահեն օրենքի տառը:
Նշենք, որ արդեն 7-րդ օրն է, որ «Սասնա ծռեր» խումբը Էրեբունիում գրոհով վերցրել են ոստիկանության ՊՊԾ գունդը եւ պատանդ են վերցրել ոստիկանների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ եւ ՊՊԾ գնդի գրոհին մասնակցած անձանցից մեկը: Մինչ այժմ իրականացվող գործողության շրջանակներում ազատվել է 7 անձ,որից երկուսն այսօր առավոտյան: Այս պահին պատանդների թիվը 2 է՝ ՀՀ փոխոստիկանապետ Վարդան Եղիազարյանն ու Երեւանի փոխոստիկանապետ Վալերի Օսիպյանը։ Արցախի ԱԺ պատգամավոր Վիտալի Բալասանյանի խոսքով, նրանք եւս այսօր ազատ կարձակվեն: