Արդեն 40 րոպերից ավելի է, որ լրագրողները մուտք են գործել ոստիկանության ՊՊԾ գնդի տարածք, որտեղ չեզոք գոտում մամուլի ասուլիսով կամ հայտարարությամբ հանդես են գալիս «Սասնա ծռեր» խմբի անդամները:
Լրագրողները Ազգային անվտանգության ծառայության ներկայացուցիչների ուղեկցությամբ ոստիկանական 4 մեքենաներով ուղևորվել են դեպի գրավված ՊՊԾ գնդի տարածք:
Լրագրողներին արգելվել է ասուլիսին մասնակցել համակարգիչներով ու հեռախոսներով: Ներսում ստուգել են նրանց եւ վերցրել բոլոր կապի միջոցները: Լրագրողների ձեռքին կան միայն տեսախցիկներ:
Նշենք, որ այսօր արդեն 7-րդ օր է, ինչ «Սանսա ծռեր» խմբի անդամները գրավել են ոստիկանության ՊՊԾ գունդը եւ պատանդ վերցրել ոստիկանների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ եւ ՊՊԾ գնդի գրոհին մասնակցած անձանցից մեկը:
Այսօր ազատ են արձակվել վերջին 4 պատանդները, այդ թվում ՀՀ փոխոստիկանապետ Վարդան Եղիազարյանն ու Երեւանի փոխոստիկանապետ Վալերի Օսիպյանը։