Խորենացի փողոցում իրավիճակը կեսգիշերին մոտ հանգիստ է։ NEWS.am-ի թղթակիցը հայտնում է, թե հանրահավաքի մասնակիցների զգալի մասը հեռացել է տարածքից, սակայն մի մեծ խումբ մնացել է, մարդիկ շրջում են, զրուցում, քննարկում օրվա ընթացքում կատարված իրադարձությունները։
«Նոր Հայաստան» շարժումը նաեւ գիշերային հերթապահություն է սահմանել, այս գիշեր հերթապահելու է «Ժառանգություն» կուսակցության ներկայացուցիչ Արմեն Մարտիրոսյանը։
Տարածքում մեծ թվով ոստիկաններ կան, որոնք նախկին օրերի պես փակել են Խորենացու փողոցի մի հատվածը։
Հիշեցնենք, որ հուլիսի 23-ին «Սասնա ծռեր» խումբը ազատ էր արձակել իրենց մոտ պահվող չորս պատանդներին, այդ թվում՝ փոխոստիկանապետ Վարդան Եղիազարյանին, Երեւանի փոխոստիկանապետ Վալերի Օսիպյանին։ Զինյալները նաեւ մամուլի ասուլիս էին տվել, լրագրողների հարցերին պատասխանել էր նաեւ Արցախի ԱԺ պատգամավոր Վիտալի Բալասանյանը, որը վերջին օրերին ակտիվորեն միջնորդական առաքելություն էր իրականացնում։
Բալասանյանը, սակայն, այլեւս զրկված է միջնորդական առաքելության հնարավորությունից, Սեֆիլյանի վերաբերյալ նրա հայտարարությունները զայրացրել էին «Սասնա ծռեր» խմբին եւ բողոքի ակցիայի կազմակերպիչներին։
