ՊՊԾ գնդի տարածքում այսօր՝ հուլիսի 24-ի երեկոյան, գունդը գրաված խմբի անդամները ոստիկանական մեքենա են այրել։ Այս մասին Խորենացի փողոցում հանրահավաքի ժամանակ հայտարարեց «Հիմնադիր խորհրդարանի» անդամ Ալեք Ենիգոմշյանը։

«22 ժամ է՝ տղաները սնունդ չեն ստացել։ Արտաքին կապն իրենց հետ թույլ է շատ։ Գումարած դրան այնտեղ կա վիրավոր երեկվա ժամը 24․00-ից սկսած բժիշկ չի մոտենում։ Չկա նաեւ հոսանք։ Ի բողոք այս վերաբերմունքի այդ տարածքի մոտակայքում քիչ առաջ ոստիկանական մի գազել վառվեց»,- ասաց Ալեք Ենիգոմշյանը։

Նշենք, որ Արցախի հերոս, ԼՂՀ Ազգային ժողովի պատգամավոր Վիտալի Բալասանյանը, որը մինչեւ երեկ միջնորդի առաքելություն էր կատարում զինված խմբի ու իշխանությունների միջեւ,  Tert.am-ին հայտնել է, որ զինված խումբը գնդի տարածքում ավտոմեքենա է հրդեհել։Նա նշել է, որ, այդուհանդերձ, պետական համապատասխան գերատեսչություններն իրեն վստահեցրել են, որ կանտեսեն նրանց այդ քայլը եւ շարունակեն բանակցությունները մինչև զինված խումբը խաղաղ կերպով վայր կդնի զենքերը։