Արդեն 32 ժամից ավելի է, որ ոստիկանության ՊՊԾ գնդում գտնվող «Սասնա ծռեր» խմբին չի տրվում էլեկտրական հոսանք, սնունդ, բժշկական ծառայություն. գիշերվանից սկսած նաեւ հեռախոսակապ չունեն: Այս մասին, այսօր՝ հուլիսի 25-ին, Խորենացի փողոցում տեղի ունեցած բացօթյա ասուլիսի ժամանակ նշել է «Հիմնադիր խորհրդարանի» անդամ Ալեք Ենիգոմշյանը:
Նրա խոսքով, սա իշխանությունների կողմից սրացման քայլեր են: «Նախօրեին փորձ է արվել մոտենալ տարածքին եւ պատ քանդել: Այս առավոտ սրացման եւ մթնոլորտի թեժացման քայլ է արվել. ռազմական ուղղաթիռը ցածրից թռել է ՊՊԾ տարածքում: Սա ցույց է տալիս, որ վարչախումբը հակված չէ խաղաղ մթնոլորտում շարունակել բանակցությունները: Նման ճնշումներով միայն վտանգավոր սրացման ուղղությամբ են գնում: Ամեն րոպե կարող են լուրջ զարգացումներ լինեն: Մենք միայն հույս ունենք, որ ողջամտությունը կտիրապետի վարչախմբի մոտ եւ նրանք չեն գնա հայ տղաների եւ հայ ոստիկանների արյունահեղությանը»,-ասել է նա:
Այնուհետեւ համակարգող խորհրդի նախաձեռնող խմբի անունից հայտարարություն է ընթերցել Ալբերտ Բաղդասարյանը: Նա նշել է, որ «Սասնա ծռեր» խումբը դիմել է ժողովրդի ապստամբությունից բխած իրավունքի իրացմանը, իսկ իշխանությունները խախտելով բոլոր միջազգային նորմերը, փորձում են տղաներին մատնել սովամահության:
«Թափված յուրաքանչյուր կաթիլ արյան, խեղված յուրաքանչյուր ճակատագրի համար պատասխանատու է Սերժ Սարգսյանն անձամբ: Անկախ այն բանից, թե դա ոստիկանության ծառայողներինն է, թե Սասնա ծռերի տղաներինը:
Առաջարկում ենք Սերժ Սարգսյանին, որպեսզի այսօր` մինչեւ երեկոյան ժամը 20:00-ն, լուծվեն ապստամբ Սասնա ծռերի սննդի, ջրի, դեղորայքի ու բուժօգնության հարցերը:
Հայ ժողովրդին, Հայաստանի քաղաքացիներին կոչ ենք անում, երեկոյան ժամը 20:00-ին հավաքվել Խորենացի փողոցում, քննարկելու համար մեր հետագա քայլերը:
Դիմում ենք Հայաստանում հավատարմագրված դեսպաններին, միջազգային կազմակերպություններին, կարմիր խաչին, որպեսզի ակտիվ միջամտություն ցուցաբերեն, օգնելու, խնդիրը բանակցային ճանապարհով, խաղաղ լուծելու համար:
Մենք համոզված ենք, որ ստեղծված իրավիճակում, միայն յուրաքանչյուրիս ակտիվ մասնակցությունից, միասնականությունից ու վճռականությունից է կախված խաղաղ, անարյուն հանգուցալուծումը»,-նշել է Բաղդասարյանը:
Նա հայտարարել է, որ իրենք անհնազանդության գործընթաց են սկսում. «Մենք զինված հակամարտությունը կտեղափոխենք քաղաքացիական դաշտ, քաղաքական հարթություն: մենք Երեւանում եւ Հայաստանի Հանրապետություն կստեղծենք բազմաթիվ օջախներ: Մենք գլխացավանք կստեղծենք անձամբ Սերժ Սարգսյանի եւ նրա վարչախմբի համար»:
Նշենք, որ շուրջ 200 ժամ է անցել Երեւանի Խորենացի փողոցում տեղի ունեցած միջադեպից, որտեղ զինված խումբը գրոհով վերցրել է ոստիկանության ՊՊԾ գունդը։
Նախօրեին ՊՊԾ գնդի տարածք մտած զինված խումբը այրել է գնդի ծառայողական մեքենաներից մեկը եւ վառվող մեքենան դուրս բերել փողոց: Ենիգոմշյանը հայտարարել է, որ մեքենան այրելը բողոքի նշան էր, քանի որ զինյալներին զրկել են ուտելիքից, բժշկական օգնությունից, անջատել են գնդի էլեկտրամատակարարումը։ Այդուհանդերձ, ըստ նրա, բանակցությունները շարունակվում են:
Հուլիսի 23-ին զինված խումբ ազատ է արձակել վերջին 4 պատանդներին, այդ թվում ՀՀ փոխոստիկանապետ, գեներալ-մայոր Վարդան Եղիազարյանին եւ Երեւանի փոխոստիկանապետ Վալերի Օսիպյանին:
