Ֆրանսիայի հասարակությունում շարունակվում է Նիսում ահաբեկչության օրը անվտանգության անբավարար միջոցառումների շուրջ ծագած բանավեճը: Վարչապետ Մանուել Վալսը համարում է, որ այդ բանավեճերը քաղաքական ենթատեքստ ունեն, հայտնում է ՏԱՍՍ-ը:
«Այդ շահարկումները ուղղված են կառավարությունը թուլացնելուն- հայտնել է Վալսը BFM-TV հեռուստաալիքի եթերում,- Դա անհրաժեշտ է դադարեցնել՝ հանուն զոհերի հիշատակի հանդեպ հարգանքի: Պետք է հնարավորություն տալ, որ իրավիճակը դատական մարմինները պարզաբանեն»:
Վարչապետը ստիպված է եղել նաեւ պաշտպանել Ֆրանսիայի ՆԳՆ ղեկավար Բերնար Կազնեւին: «Նա հրաշալի նախարար է ու բարձր բարոյական հատկանիշներով մարդ»,- նկատել է Վալսը, որի հայտարարությունների պատճառը լրատվամիջոցներում արվող նորանոր բացահայտումներն են:
Անցած հանգստյան օրերին Le Journal du Dimanche թերթը գրել էր, որ Կազնեւի ղեկավարած գերատեսչությունը փորձել է ճնշում գործադրել Նիսի մունիցիպալ ոստիկանության բարձրաստիճան աշխատակցի վրա, որպեսզի նա փոփոխություններ անի ահաբեկչության օրը Նիսում ձեռնարկված անվտանգության միջոցառումների մասին հաշվետվությունում: Այդ փաստաթուղթը պահանջել էր հենց ՆԳՆ-ն, ի պատասխան այն մեղադրանքներին, որ Անգլիական ափին ոստիկանության ներկայությունը անբավարար է եղել:
Մասնավորապես պարբերականը վստահեցնում է, որ Փարիզից պահանջել են հաշվետվությունում նշել, իբրեւ ահաբեկչության վայրում այդ օրը հերթապահել են ազգային ոստիկանությա ն աշխատակիցները, չնայած տեսահսկման կադրերը հակառակն են ապացուցում:
