Բաքու իրականացրած այցի ընթացքում Թուրքիայի ԱԳ նախարար Մեւլութ Չավուշօղլուն քննարկումներ է իրականացրել Հայաստանի հետ հարաբերությունների կարգավորման նախաձեռնություն սկսելու համար եւ դրական միտումներ են եղել։ Նման տեղեկություն է հայտնել թուրքական Hurriyet–ի թղթակից Ֆաթիհ Չեքիրգեն։
Թուրք լրագրողն իր հրապարակման մեջ նշել է, թե մինչ հեղաշրջման փորձը Անկարան ՌԴ–ի հետ հարաբերությունները կարգավորելուց հետո ցանկացել է նախաձեռնել Հայաստանի հետ հարաբերությունների կարգավորում, ընդհուպ մինչեւ սահմանների բացում։
«Հայաստանի հետ հարաբերությունների կարգավորման համար առաջին նախաձեռնությունը ԱԳ նախարար Չավուշօղլուն արել է հուլիսի 14–15–ին Բաքու կատարած այցի ժամանակ։ Նա փորձել է Բաքվում ստուգել Հայաստանի հետ հարաբերությունները կարգավորելու նախաձեռնության արձագանքը։ Եւ դրական միտում է եղել։ Ռուսաստանի հետ հարաբերությունների կարգավորումից հետո Թուրքիան խոսում էր Ադրբեջանի հետ՝ Հայաստանի հետ խաղաղության ժամանակացույց կազմելու ուղղությամբ, երբ սկսվեց ռազմական հեղաշրջման փորձը»,–գրել է Hurriyet–ի թղթակիցը։
