Վրաստանի նախագահ Գեորգի Մարգվելաշվիլին հայտարարել է, որ իր ընտանիքի անդամների վրա ճնշման փորձ է եղել, սակայն, չի մանրամասնել, թե ում նկատմամբ է կոնկրետ իրականացվել այդ ճնշումը:
«Կանգնեցրել են փողոցում, այնուհետեւ խուզարկել են նրա տունը: Առանց դատարանի որոշման՝ այն հույսով, որ դրան ինչ-որ բան կհետեւի: Բնականաբար, ամեն ինչ բացարձակ մաքուր է եղել, եւ ոչ մի օրինախախտում չի եղել: Եղել են որոշակի ակնարկներ, որ դա հենց ճնշման փորձ է եղել տվյալ անհատի վրա»,- հայտարարել է նախագահը:
«Փիրվելի» հեռուստաընկերությունը պարզել է, որ դա վերաբերում է նախագահի դստեր տանը կատարված խուզարկությանը: Հեռուստաընկերության տեղեկություններով՝ երբ փողոցում կանգնեցրել են Գիգի Չիչուային, նախագահի դստեր՝ Աննա Մարգվելաշվիլիի եւ նրա ամուսնու՝ Գիգի Չիչուայի տանը խուզարկություն է կատարվել:
Վրաստանի նախագահն այսօր հանդիպել է Սահմանադրական դատարանի նախագահ Գեորգի Պապուաշվիլիի հետ, որը նրան զեկուցել է դատավորների վրա գործադրվող ճնշման մասին: Նախագահը դրան հաջորդող ճեպազրույցի ժամանկ ասել է, որ զարմացած չէ, քանի որ վերջերս ճնշման է ենթարկվել նաեւ իր ընտանիքի անդամը։