ԼՂՀ պաշտպանության բանակի հարավարեւելյան ուղղությամբ տեղակայված զորամասերից մեկի պահպանության տեղամասում տեղի ունեցած արտակարգ պատահարի հետեւանքով փետրվարի 19-ի վաղ առավոտյան զոհված 19-ամյա Թեմուր Սլոյանի մայրը խնդրում է իրեն տրամադրել իր որդու մահվան դեպքով քրեական գործ հարուցելու մասին որոշումը։
NEWS.am-ի հետ զրույցում իրավաբան Հասան Թամոյանը նշեց, որ հուլիսի 11–ին Խանում Սլոյանը դիմում է գրել ՀՀ քննչական կոմիտեի ԶՔԳՎ երկրորդ կայազորային քննչական բաժին, որով խնդրում է նաեւ իրեն տեղեկացնել, թե հարուցված քրեական գործում ինքն ինչ կարգավիճակ կարող է ունենալ եւ ինչ փուլում է նախաքննությունը։
«Մայրն ուզում է հասկանալ՝ քրեական գործն հարուցվելուց հետո նա որեւէ կարգավիճակ ունի, թե չէ։ Դեպքից 5 ամիս է արդեն անցել, սակայն, դեռ Թեմուրի մոր համար պարզ չէ, թե քրեական գործն ինչ փուլում է եւ ինքը քրեական գործով ինչ կարգավիճակ կարող է ունենալ։ Նա խնդրել է քրեական գործ հարուցելու մասին որոշումն ունենալ, ինչի իրավունքն ունի, սակայն, արդեն 14 օր է անցել, դեռ որեւէ պատասխան չկա»,–ասաց Հասան Թամոյանը։
Նշենք, որ Թեմուր Սլոյանը Կոտայքի մարզի Պռոշյան համայնքից էր: Նա տան փոքրն էր, իրենից մեծ երեք քույր ունի: Հայրն էլ տարիներ առաջ էր մահացել, Թեմուրն ապրում էր մոր հետ:
Նշենք, որ ըստ ՔԿ տարածած հաղորդագրության` նախնական տվյալներով՝ 2016 թվականի փետրվարի 19-ին՝ ժամը 06:50-ի սահմաններում, N զորամասի 3-րդ ջոկի գնդացրորդ, շարքային Թ.Սլոյանը, նույն զորամասի պահպանության տակ գտնվող մարտական դիրքի դիտակետի մոտ իրեն ամրակցված գնդացրից կրակել է նույն ջոկի հրամանատար, մարտական դիրքի ավագ, կրտսեր սերժանտ Կամո Հովհաննիսյանի դեմքի շրջանին։ Ստացած վնասվածքից Կ.Հովհաննիսյանը տեղում մահացել է, որից հետո շարքային Սլոյանը ինքն իրեն գլխի շրջանում պատճառել է հրազենային մահացու վիրավորում:
Նկատի ունենալով, որ նախապատրաստված նյութերում առերևույթ առկա են ՀՀ քրեական օրենսգրքի 104-րդ հոդվածի 1-ին մասով և 110-րդ հոդվածի 1-ին մասով նախատեսված հանցագործությունների հատկանիշներ մատնանշող բավարար տվյալներ՝ երկրորդ կայազորային քննչական բաժնում հարուցվել է քրեական գործ։
Ձեռնարկվում են անհրաժեշտ քննչական գործողություններ՝ դեպքի բոլոր հանգամանքները, շարժառիթները պարզելու ուղղությամբ։
Ավելի վաղ ԼՂՀ ՊԲ մամուլի ծառայությունը հայտնել էր, որ 2016թ. փետրվարի 19-ին` ժամը 07:00-ի սահմաններում, ՊԲ հարավարեւելյան ուղղությամբ տեղակայված զորամասերից մեկի պահպանության տեղամասում տեղի ունեցած արտակարգ պատահարի հետեւանքով հրազենային մահացու վիրավորում են ստացել ՊԲ զինծառայողներ, 1997թ. ծնված Կամո Արայի Հովհաննիսյանը եւ Թեմուր Շարիի Սլոյանը:
Դեպքի մանրամասները պարզելու համար կատարվում է քննություն: