ՀԴԲ-ն հետաքննում է ԱՄՆ Դեմոկրատական կուսակցության Ազգային հանձնաժողովի էլեկտրոնային փոստի կիբեր-հարձակման բնույթն ու ծավալները՝ կապված դրան ռուսաստանցի հաքերների մասնակցության մտավախությունների հետ՝ ԱՄՆ-ի նախագահական ընտրությունների վրա ազդելու նպատակով:
Ըստ Reuters-ի՝ ՀԴԲ-ի հայտարարությունում նշվում է, որ Բյուրոն լրջորեն է վերաբերվում նման հարձակումներին եւ կշարունակի հետաքննությունը՝ նպատակ ունենալով պատասխանատվության ենթարկել նրանց, ովքեր սպառնալիք են ներկայացնում վիրտուալ տիրույթում:
Նշենք, որ WikiLeaks-ի կայքում հրապարակվել է հանձնաժողովի անդամների նամակագրությունը, որից պարզ է դարձել, որ նրանք փրայմերիզի ընթացքում նախընտրել են Հիլարի Քլինթոնին՝ փորձելով խայտառակել նրա մրցակից, սենատոր Բեռնի Սանդերսին: Սկանդալի արդյունքում հանձնաժողովի նախագահ Դեբի Վասերման-Շուլցը հայտարարել է կուսակցության համագումարի ավարտից հետո հրաժարական ներկայացնելու մասին:
