Խորենացի փողոցում հավաքված բազմությունը երթ է սկսել Երեւանի փողոցներով։

NEWS.am-ի թղթակցի փոխանցմամբ, երթը, ըստ կազմակերպիչների, անցնելու է Խորենացի փողոցով, Նարդոսով, Նալբանդյանով, Թումանյան փողոցով դեպի Աբովյան փողոց, Հանրապետության հրապարակով եւ Տիգրան Մեծով վերադառնալու են Խորենացի փողոց։ Երթուղին հայտնել է «Ժառանգություն» կուսակցության ներկայացուցիչ Արմեն Մարտիրոսյանը։

Երթի մասնակիցները վանկարկել են «Պավլիկ» եւ «Միացիր», փողոցներով անցնող վարորդները ազդանշաններով ողջունում են երթի մասնակիցներին։

Նշենք, որ երթի մասնակիցներին ուղեկցում են ոստիկանության փոքրաթիվ ուժեր։

Ավելի վաղ հանրահավաք էր կայացել, որի ընթացքում ելույթ էին ունեցել Արմեն Մարտիրոսյանը, Ալեք Ենիգոմշյանը, Գյումրիի «Ասպարեզ» ակումբի նախագահ Լեւոն Բարսեղյանը, «Արձագանք. Ստուդիայի հիմնադիրներից Եղիշե Պետրոսյանը, «Ժառանգություն» կուսակցության անգամ Դավիթ Սանասարյանը, ազատամարտիկ Խաչատուր Խաչատրյանը։ Հանրահավաքի մասնակիցները նշել են, որ իրենց պահանջները չեն փոխվել։ Նրանք նաեւ պահանջում են վերականգնել «Սասնա ծռեր» խմբի սնունդը, էլեկտրականությունը, բուժօգնությունն ու կապը։

​