«Հիմնադիր խորհրդարանի» մամուլի պատասխանատու Սյուզան Սիմոնյանը ձերբակալված չէ, այլ անցել է ընդհատակ։ Այսօր՝ հուլիսի 25-ին տեղեկություն էր տարածվել, թե ոստիկանությունը հետապնդում է Սիմոնյանին, ապա Խորենացի փողոցի հանրահավաքում Ալեք Ենիգոմշյանը հայտարարեց, թե նրան ձերբակալել են։
Քիչ առաջ Սյուզան Սիմոնյանը հաղորդագրություն է տարածել, որում ասվում է. «Սիրելի ժողովուրդ, ես լսեցի, որ իմ զինակիցները տեղեկություն ունեն, որ ես ձերբակալված եմ: Սակայն դա այդպես չէ:
Ես, պարզապես, անցա ընդհատակ անմիջապես այն պահից հետո, երբ տեղեկացա, որ ոստիկանությունը փնտրում է ինձ իմ երկրորդ բնակարանում, որտեղ ես գրանցված եմ: Մինչ ընդհատակ անցնելս, ես դիմեցի իրավապաշտպաններին, սակայն նաեւ արագ որոշում կայացրեցի, որ ավելի լավ է ապօրինի քաշքշուկների մեջ չընկնեմ, որպեսզի կարողանամ աշխատել:
Իրավապաշտպաններն այդպիսի տպավորություն ստացան, քանի որ իրենց հետ կապվելուց հետո, ես լքեցի իմ բնակարանը: Ընկերներս նույնպես այդպիսի տպավորություն ստացան, քանի որ նրանց համար էլ անհասանելի դարձա:
Քանի որ ես հանդիսանում եմ Հիմնադիր խորհրդարանի մամուլի պատասխանատուն , ստիպված էի ընդհատակ անցնել, որպեսզի կարողանամ հնարավորինս շարունակել իմ աշխատանքը: Շատ շուտով ես կրկին կանցնեմ տեղեկատվական դաշտը համակարգելու իմ պարտականությանը»,- նշել է նա:
